Suśvietna viadomy francuzski akcior Žerar Depardjo adkazaŭ prem'jer-ministru Francyi Žanu Marku Ero, jaki nazvaŭ jaho «ŭbohim» za toje, što akcior pierajechaŭ žyć u Bielhiju. Depardjo pryniaŭ rašeńnie emihravać z Francyi ŭ Bielhiju, kab nie płacić vysokaha padatku. Urad sacyjalistaŭ uźniaŭ staŭku padatkaŭ dla samych bahatych da 75%.
Praŭda, Ero paźniej zajaviŭ, što nie nazyvaŭ «ubohim» Depardjo najmia, adnak ličyć ubohimi padatkovyja ŭcioki akciora ŭ Bielhiju i zaklikaje zamožnych francuzaŭ prajavić patryjatyzm i hramadzianskuju salidarnaść u pieryjad ekanamičnaha i finansavaha kryzisu. Depardjo zaŭždy padtrymlivaŭ pravych i Sarkazi, a nie sacyjalistaŭ.
Pracytujem list Depardjo całkam.
«Ja naradziŭsia ŭ 1948 hodzie i ŭ 14 hadoŭ pačaŭ pracavać u drukarni, potym roznarabočym, zatym jak dramatyčny akcior. Ja zaŭsiody płaciŭ padatki, nie zaležna ad urada, jaki byŭ va ŭładzie.Ja nikoli nie paźbiahaŭ maich abaviazkaŭ. Filmy, u jakich ja zdymaŭsia, śviedčać pra maju luboŭ da Francyi i da jaje historyi.
Hetuju krainu pakinuli ludzi bolš viadomyja, čym ja. I mnie, na žal, bolš niama čaho tut rabić.Ale ja budu praciahvać lubić Francyju i publiku, ź jakoj ja dzialiŭ stolki emocyj.
Ja jedu, bo vy ličycie, što pośpiech, talent, tvory, lubaja sproba być nie takim, jak usie, pavinny być sankcyjanavanyja.
Ja nie prašu, kab mianie ŭchvalali, ale chacia b pavažali. Nikoha, z tych, chto pakinuŭ Francyju, nie abražali tak, jak mianie.Ja nie abaviazany tłumačyć pryčyny majho vybaru, ich zanadta šmat, i jany zanadta asabistyja.
Ja jedu, vypłaciŭšy vam 85% padatkaŭ z zaroblenych mnoju hrošaj.
Ja addaju vam moj pašpart i maju sacyjalnuju strachoŭku, jakoj ja nikoli nie karystaŭsia. U nas z vami niama ahulnaj radzimy, ja praŭdzivy jeŭrapiejec, hramadzianin śvietu, jak navučyŭ mianie moj baćka.
Ja znachodžu «nikčemnym» sudzilišča nad maim synam, jakoha chłapčukom prysudzili da troch hadoŭ turemnaha źniavoleńnia za 2 hramy hierainu, tady jak inšyja za bolš ciažkija złačynstvy razhulvajuć na svabodzie.
Ja nie kidaju kamień u tych, chto maje vysoki chalesteryn, cisk ci dyjabiet, užyvaje ałkahol i zasynaje za rulom svaich matacykłaŭ. Ja ž adzin ź ich, jak lubiać platkaryć ŚMI. Ale ja nikoli nikoha nie zabiŭ, i nie dumaju, što zasłuhoŭvaju być prynižanym.
Za 45 hadoŭ ja vypłaciŭ 145 młn padatkaŭ, daŭ pracu ludziam u kampanijach, jakija byli stvorany dla ich i kirujucca imi.
Ja nie chvalusia i nie skardžusia, ale ja admaŭlajusia pryniać słova «mizerny»!
Chto Vy taki, kab mianie sudzić, ja Vas pytajusia, mieśje Ero, prem'jer-ministr mieśje Alanda, ja Vas pytajusia! Chto Vy taki?
Niahledziačy na ŭsie maje ekscesy, moj apietyt i luboŭ da žyćcia, ja pierš za ŭsio volny čałaviek, Mieśje, i zastanusia z Vami vietlivym».
U razhar prezidenckaj pieradvybarčaj kampanii ŭ Francyi lidar sacyjalistaŭ Fransua Aland prapanavaŭ u metach pieraadoleńnia deficytu biudžetu pavysić z 2013 hoda da 75% staŭku padachodnaha padatku dla hramadzian, jakija zarablajuć bolš za miljon jeŭra ŭ hod. U suviazi z hetym niekatoryja zamožnyja ludzi, u liku jakich apynuŭsia Depardjo, vyrašyli pakinuć Francyju.
Ero ž pastaviŭ u prykład bahatych francuzaŭ, jakija płaciać vializnyja padatki, adnak nie źjazdžajuć z krainy, bo adčuvajuć siabie adkaznymi za jaje los. Pavodle jaho słoŭ, z krainy biahuć niamnohija.
Palitviazień pravioŭ paŭtara hoda ŭ SIZA — voś jak jon vyhladaŭ paśla hetaha11
Kamientary