З жырандоляй на галаве: у Мінску праходзіць MSK Fashion Week

Нацыянальны мастацкі музей Рэспублікі Беларусь стаў пляцоўкай для правядзення першага сезона MSK Fashion Week.

Якуб Колас строга пазірае з карціны Стэльмашонка на мітусню, якая пануе на другім паверсе новага зала ў Палацы мастацтваў. Звыклы супакой, у якім штодня знаходзяцца працы Вашчанкі, Сумарава і Данцыга, разбівае гучная электронная музыка, якую старанна выводзіць дыджэй. Адзінае, што нагадвае пра звычайныя будні музея і не дае канчаткова знішчыць яго атмасферу -гэта «жанчыны-статуэткі», якія ціха і непахісна сядзяць у сваіх крэслах каля кожнай з выставачных залаў і як тыя абярэгі ахоўваюць мастацтва мінулых стагоддзяў ад «небяспечнага» ўплыву экстравагантных асоб, што ходзяць туды-сюды і парушаюць цішыню. Гэтае атмасфера — сутыкненне ў адной прасторы тэндэнцыйнасці сучаснай моды з артадаксальным мастацтвам — уводзіць цябе ў лёгкае замяшанне.

MSK Fashion Week — новы праект, які не мае нічога супольнага з Belarus Fashion Week. Яго мэтай, як і ў пераважнай большасці тыдняў моды, заўсёды з’яўляецца папулярызацыя і падтрымка беларускіх дызайнераў, папулярызацыя дызайнерскага адзення сярод насельніцтва Беларусі, а самае галоўнае — прыцягненне замежных кліентаў, інвестараў і баераў (даслоўна — «закупшчыкаў»), якія фармуюць асартыменты закупаў у крамах.

Што да праграмы праекту, які 4 дні будзе скалынаць Мастацкі музей, то яна ўключае модныя паказы, а таксама адукацыйны блок, у рамках якога пройдуць лекцыі, майстар-класы, прэзентацыі ад прафесіяналаў у галіне візажу, цырульніцкага мастацтва, фатаграфіі, журналістыкі, моды і стылю. У рамках Тыдня пройдуць паказы як айчынных, так і запрошаных дызайнераў.

Паказы на MSK Fashion Week маюць закрыты характар і трапіць туды можна толькі па запрашэннях. У апошнія дні перад паказамі было выдадзена невялікая колькасць квіткоў на продаж, але не паўсюль іх можна знайсці.

Першы дзень паказаў адбываўся без асаблівых накладак, тое, што анансаваны час пачатку паказаў затрымліваўся на паўгадзіны, стала нормай на ўсіх модных паказах і не выклікала здзіўлення ці абурэння, дый кожнаму было лёгка знайсці чым заняцца: ад магчымасці бясплатна пахадзіць і паглядзець экспазіцыі, прадстаўленыя ў музеі, сканчваючы майстар-класамі па нанясенні макіяжу. Запрошаных людзей было шмат, але абыходзілася без затораў і таўкатні, толькі часам можна было заўважыць, што некаторым «патрэбным» гасцям бракавала месца і арганізатары бегалі ў пошуках вольных месцаў ці крэслаў.

Адкрывала MSK Fashion Week маладая дызайнерка Валянціна Няборская.

Перад яе паказам мы трапілі ў грымёрку і паглядзелі ў на тое, што адбываецца за кулісамі — якая атмасфера там пануе і як увогуле рыхтуюць мадэляў.

У першыя секунды разабрацца ў тым, што адбываецца навокал, даволі складана. З вялікімі прычоскамі, у дзіўных, у нечым казачных касцюмах з невялічкім адценнем японскай каларыстыкі паўсюль рухаюцца дзіўныя «стварэнні», іх фарбуюць, камусьці падпраўляюць прычоскі, хтосьці фоткаецца, а хтосьці псіхуе. Але пры ўсёй хаатычнасці дзеянняў і крыкаў арганізатара, што адзін спазняецца, другі не прыйшоў ці зрабіў нешта праз «пятую кропку», усе дзеянні маюць структураваны характар. Паветра прасякнута эмоцыямі і энергіяй, якая ідзе ад кожнага.

Энергія, дарэчы, узялася не з пустога месца, практычна ў кожнага ў руках бляшанка энергетычнага напою, часам нават не адна.

Яе калекцыя мае назву «Згубленыя ў тумане надзеяў». «Гэта не проста мода дзеля моды, гэта не проста пафас. Для мяне гэта перадусім мастацтва, праз якое можна гаварыць. І я хачу, каб кожны з тых, хто прыйшоў паглядзець гэты паказ, адчуў тыя эмоцыі, якія я ўклала ў кожны з касцюмаў», — тлумачыць яна.

Акрамя самой калекцыі, якая складаецца з дзесяці мужчынскіх і дзесяці жаночых вобразаў, былі паказаны касцюмы для акцёраў тэатра, якія выступілі ў міні-шоу падчас паказу і выклікалі безліч эмоцый у гледачоў.

«Я думала, што будуць прылізаныя гламурныя цёткі, а тут такі фармат цікавы, такі пасыл. Нечакана,« — дзяліліся сваімі ўражаннямі пасля паказу дзяўчаты.

Пасля Няборскай былі паказы дызайн студыі PaRus JEANS, калекцыя якіх была прадстаўлена з джынсавых касцюмаў ды касцюмаў спартыўнага пакрою. Яна прызначалася для свабодных і актыўных людзей. Гэты паказ запомніўся «прыгожай дзяўчынай з голым торсам», якую абмяркоўвалі з вялікай ахвотай.

Трэці паказ прадстаўляла DRAGOTSENNAYA ANNA. «У святле сафітаў, з урачыстай вышыні сцэны або на ўзроўні вачэй, на адлегласці выцягнутай рукі ў рытме будных дзён — не змяняйце твару, мяняйце сукенку» Калекцыя сапраўды была прадстаўленнем «у святле сафітаў»: па чырвонай дарожцы мадэлі ў атласных урачыстых сукенках часам са стразамі, часам з каронай і нават спецыфічнай «жырандоляй» на галаве «бліскалі» перад экспертамі і гледачамі.

Пасля паказаў людзі не спяшаліся разыходзіцца. Хтосьці рабіў на памяць фота на фоне модных банэраў, хтосьці абмяркоўваў паказы і толькі «жанчыны-статуэткі» як сядзелі, так і засталіся сядзець.

Арганізаваць першы дзень з яго fashion-мерапрыемствамі ў арганізатараў удалося даволі добра. Што да вынікаў і ўплыву на індустрыю моды, то судзіць не нам. На гэта ёсць спецыялісты і людзі, якія наведваюць паказы, лекцыі, майстар-класы і старанна імкнуцца выцягнуць «за вушы» тое, што ў свеце імянуецца «модай».

• 0
• 0
• 0
• 0
• 0
• 0
• 0
• 0