Затрыманы намеснік гендырэктара «Белэнерга» Міхаіл Лузін?
Працоўны тэлефон Лузіна не адказвае, а ў прыёмнай кажуць, што яго няма і калі будзе — невядома.
Пра гэта «Еўрарадыё» паведаміла крыніца ў канцэрне. Міхаіл Лузін у «Белэнерга» курыруе пытанні знешнеэканамічнай дзейнасці і інвестыцый, а таксама закупкі тавараў для будаўніцтва «пад ключ».
Яго затрыманне можа быць звязана з расследаваннем крымінальнай справы па зрыву тэрмінаў пастаўкі і ўводу ў эксплуатацыю паратурбіннай ўстаноўкі для Бярозаўскай ДРЭС. Справу расследуе Следчы камітэт Беларусі. Дарэчы, у СК наўпрост затрыманне Еўрарадыё не пацвердзілі, але і не абверглі.
Прадстаўніца Следчага камітэта Юлія Ганчарова: «На падставе аналізу атрыманых доказаў, следства мяркуе, што ў дзеяннях службовых асобаў Міністэрства энергетыкі Рэспублікі Беларусь, ААТ «Белэнергазабеспкамплект» і «Белэнерга» ўгледжваецца склад злачынства, прадугледжанага артыкулам 428 Крымінальнага кодэкса Беларусі — службовая халатнасць. Па справе прызнаныя падазраванымі шэраг службовых асоб дзяржаўнага аб'яднання «Белэнерга» і ААТ «Белэнергазабеспкамплект».
На думку следства, неналежнае выкананне службовымі асобамі сваіх абавязкаў прывяло да заключэння дамовы на пастаўку абсталявання з кампаніяй, якая раней паратурбінныя ўстаноўкі заяўленых параметраў не вырабляла і па сваіх фінансава-эканамічных паказчыках не магла гарантаваць выканання дамоўных абавязкаў у належныя тэрміны.
Нагадаем, што 16 красавіка ў беларускага кіраўніка прайшла нарада па развіцці энергетыкі. На ёй Лукашэнка заявіў, што энергетыкі збудавалі сваю дзяржаву ў дзяржаве ды яшчэ «з элементамі банды і мафіі». 18 красавіка былі звольненыя міністр энергетыкі Аляксандр Азярэц, яго першы намеснік Эдуард Таўпянец і генеральны дырэктар «Белэнерга» Аляксей Шырма.
22 красавіка новым міністрам энергетыкі стаў Уладзімір Патупчык, а Яўген Воранаў узначаліў «Белэнерга».
Цяпер чытаюць
20‑гадовую дзяўчыну з аграгарадка Макраны на мяжы з Украінай асудзілі за Гаюна4
20‑гадовую дзяўчыну з аграгарадка Макраны на мяжы з Украінай асудзілі за Гаюна
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі1818
Каментары