Ёсьць нагода наведаць Варшаву — паглядзець на маладога Сталіна — як каўкаскі Робін Гуд Сасо ператвараецца ў крамлёўскую пачвару Кобу.
Дзея адбываецца на сцэне Драматычнага тэатру ў Палацы культуры і навукі ў самым цэнтры польскай сталіцы. Прэм’ера была вясною, але й сёньня паказы ідуць пры поўнай залі.
П’еса Тадэвуша Слабадзянка створаная і пастаўленая славакам Андрэем Сьпішкам у парамэтрах «новае журналістыкі» — пад ёй калясальная дакумэнтальная база і неверагодная праца актораў.
Грузінскія сьпевы і лезгінка ў выкананьні палякаў проста зачароўваюць, асабліва тым, што вас не зьбіраюцца падманваць, ніводная бляндынка не перафарбаваная ў брунэтку.
«Гангстэрскі раман у рытме лезгінкі» — так вызначаны жанр пастаноўкі, дзе вы пабачыце масу гістарычных пэрсанажаў: ад гумарнога Фройда і псыхапатычнага Гітлера да хуліганістага задзіракі Леніна і нейкай Людмілы Сталь, багатай рэвалюцыяністкі, якая суправаджае Сасо па Эўропах.
У Лёндане, выбіраючы сабе псэўданім, Сасо глядзіць на расфуфыраную Людмілу, і робіць сам сабе адкрыцьцё: Сталін!
Цалкам раскрытая і тэма Пржавальскага, нібыта сапраўднага бацькі Сталіна (падабенства). Аказваецца, шляхціц Пржавальскі аддаваў перавагу горскім хлопцам, а не дзяўчатам, таму вэрсія адпадае.
Кульмінацыя трохгадзінавага спэктаклю — людзі Кобы рабуюць банк. Кроў цячэ ракою. Сам Сталін стрэлам у галаву забівае ні ў чым не вінаватага аднаклясьніка — ці ня першае забойства ў ягоным жыцьці. Уласна ў гэты момант Сасо і ператвараецца ў Кобу.
Павольна-марудна ён заходзіць на круг нязьменнае лезгінкі — пачынае сваю гістарычную раскрутку. Заслона.
Але чаму ён без вусоў? На афішы з вусамі, а на сцэне без вусоў.
Таямніца хаваецца ў фэерычнай пастаноўцы. Вусы — растуць!
-
Наста Кудасава адправілася ў паэтычны тур па краінах Балтыі
-
«Дэкаланізацыя — гэта прыйсці і заняць сваё месца». Наста Рагатко будзе ўдзельнічаць у фестывалі расійскай кнігі. Суліма яе асудзіў, яна не змаўчала ў адказ
-
Памёр стваральнік Сляпянскай воднай сістэмы. Здаецца, унікальны канал неўзабаве таксама можа памерці
Цяпер чытаюць
«Дэкаланізацыя — гэта прыйсці і заняць сваё месца». Наста Рагатко будзе ўдзельнічаць у фестывалі расійскай кнігі. Суліма яе асудзіў, яна не змаўчала ў адказ5050
«Дэкаланізацыя — гэта прыйсці і заняць сваё месца». Наста Рагатко будзе ўдзельнічаць у фестывалі расійскай кнігі. Суліма яе асудзіў, яна не змаўчала ў адказ50
Ці патрэбная беларуская мова тым, хто размаўляе па-руску? Азаронак задаўся такім пытаннем на СТБ, а выпускнік Акадэміі МУС прапанаваў замяніць урокі факультатывамі4949
Каментары