Кандыдат у прэзідэнты Юлія Цімашэнка лічыць, што нельга ўжываць сілу супраць узброеных баевікоў на ўсходзе Украіны.
Пра гэта яна сказала ў інтэрв'ю «Падзеям тыдня» на тэлеканале «Украіна» ў нядзелю.
На яе думку, існуе два шляхі выхаду з сітуацыі.
«Першы шлях — неадкладнае прымяненне сілы, якое амаль напэўна прывядзе да маштабнага кровапраліцця, і, хутчэй за ўсё, да агрэсіі ў адказ Расійскай Федэрацыі. Гэты варыянт адказныя кіраўнікі краіны, на мой погляд, так проста прыняць не могуць», — заявіла Цімашэнка.
Замест гэтага, на яе думку, улады Украіны павінны вырашыць праблему шляхам перамоваў на самым высокім сусветным узроўні.
«Другі варыянт — гэта вядзенне перамоваў на самым высокім сусветным узроўні. І сёння ўсе на гэта спадзяюцца. Калі ў Жэневе збіраюцца, практычна, першыя асобы міжнародных ведамстваў, такіх значных гульцоў, гэта кажа пра тое, што ўвесь свет зараз засяроджаны на Украіне і спрабуе вырашыць ўкраінскія праблемы», — адзначыла яна.
