Уладальнік дачнага ўчастка ў Віцебскім раёне аформіў верхнюю частку дома ў выглядзе галавы сфінкса.
На ўездзе ў садоўніцкае таварыства «Будаўнік» відаць незвычайны будынак амаль 8-метровай вышыні. Над яго ўзвядзеннем аўтар і выканаўца гэтай ідэі Руслан Кушчын працаваў два гады.
Ён працуе плітачнікам на віцебскім будаўнічым прадпрыемстве. З юнацкіх гадоў захапляецца архітэктурай, і гэтае хобі знайшло прымяненне ў побыце — дачны ўчастак паступова відазмяняецца.
«Ідэя збудаваць галаву сфінкса прыйшла невыпадкова. Хацелася падарыць жонцы адно з 7 цудаў свету. Паколькі я Леў паводле гараскопу, а ў сфінкса — цела льва, то вырашыў, што трэба «пасяліць» яго на дачы», — сказаў Руслан Кушчын.
Галава сфінкса — дачная славутасць, якая дзівіць аматараў экзотыкі. Яна займае два паверхі і паддашкавае памяшканне (тут знаходзіцца майстэрня, вокны якой з'яўляюцца вачыма сфінкса і ў цёмны час падсвятляюцца).
Па прызнанні Руслана Кушчына, ён узводзіў будынак без якога-небудзь праекта. Будаваў з натуральных матэрыялаў — гліны, пяску, саломы. Затым пакрыў цэментавым растворам, а для стварэння рэльефных дэталяў выкарыстаў пенапласт. Нягледзячы на тое, што ўсе матэрыялы лёгкія, будынак вытрымлівае любую непагадзь.
Гаспадар дачы мае намер аформіць гаспадарчыя пабудовы, якія стаяць перад домам, у выглядзе лап міфічнай істоты, каб падтрымаць агульную канцэпцыю.
Цяпер чытаюць
Беларус, які ваяваў за Украіну, распавёў, чым яго зачаравала каханка Іна Кардаш, агентка КДБ26
Беларус, які ваяваў за Украіну, распавёў, чым яго зачаравала каханка Іна Кардаш, агентка КДБ
Учора — у лукашэнкаўскай турме, сёння — у Кіеве дапамагае ўкраінцам выжыць. Былы палітвязень і сваяк Ціханоўскай стаў валанцёрам у Пункце нязломнасці66
Каментары