«Лепш 28‑м членам ЕС, чым 51‑м штатам ЗША». Прэзідэнт Фінляндыі прапанаваў запрасіць у Еўрасаюз Канаду
Прэзідэнт Фінляндыі Аляксандр Стуб выказаў меркаванне, што Еўрапейскаму Саюзу варта значна пашырыцца і ў будучыні аб’яднаць каля 40 дзяржаў. На яго думку, гэта дапаможа ЕС умацаваць свае пазіцыі на міжнароднай арэне і стаць больш уплывовай сілай у свеце, піша CNBC.
Выступаючы на энергетычным форуме Eurelectric Power Summit у Хельсінкі, Стуб назваў краіны, якія маглі б у перспектыве далучыцца да Еўрасаюза або атрымаць асабліва цесныя адносіны з ім. Сярод іх — Вялікабрытанія, Канада, Турцыя, Нарвегія і Ісландыя.
Паводле слоў фінскага лідара, цяпер існуе спрыяльны момант для пашырэння ЕС, паколькі вайна ва Украіне і змены ў палітыцы ЗША прымушаюць многія краіны па-новаму ацэньваць перавагі супрацоўніцтва з Еўрапейскім Саюзам.
Асобна ён адзначыў, што Вялікабрытанію, якая выйшла з ЕС у 2020 годзе, варта зноў максімальна наблізіць да еўрапейскай супольнасці. Гаворачы пра Канаду, Стуб жартам заўважыў, што ёй было б лепш стаць 28‑м членам Еўрасаюза, чым увайсці ў склад Злучаных Штатаў у якасці 51‑га штата, намякаючы на нядаўнія заявы прэзідэнта ЗША Дональда Трампа.
Фінскі прэзідэнт таксама заклікаў не забывацца пра Турцыю, якая ўжо даўно застаецца кандыдатам на ўступленне ў ЕС. На яго думку, гэтая краіна мае вялікае значэнне для бяспекі Еўропы. Акрамя таго, ён падкрэсліў важнасць далейшай інтэграцыі краін Заходніх Балкан.
Сярод паўночных дзяржаў Стуб вылучыў Ісландыю, дзе плануецца рэферэндум па пытанні пачатку перамоў аб уступленні ў ЕС, а таксама Нарвегію, якая таксама пераглядае свае адносіны з Еўрапейскім Саюзам.
Разам з тым ён прызнаў, што пакуль няма канкрэтнага плана, як і калі можна рэалізаваць такую маштабную ідэю. Аднак, на яго думку, Еўропа павінна мысліць больш шырока і дзейнічаць больш рашуча, калі хоча захаваць свой уплыў у свеце.
Цяпер чытаюць
Пасля ўльтыматуму Зяленскага рэтранслятары адключылі? Апошнія дні расійскія беспілотнікі не накіроўваюцца ўздоўж беларуска-ўкраінскай мяжы7
Каментары