«Гэта знак таго, што кіроўца — быдла». Мінчукоў абурыў расійскі аўтамабіль. Што гэтым разам?
У цэнтры Мінска каля адной з кавярняў мінакі заўважылі пазадарожнік з расійскімі нумарамі, уладальнік якога паказаў яшчэ адзін варыянт нахабства расійскіх кіроўцаў. Фотаздымкам незвычайнага «цюнінгу» падзяліўся карыстальнік Threads Яраслаў.
На нумарах прыпаркаванай машыны вісела звычайная будаўнічая пальчатка, якая закрывала першыя лічбы. Аўтар публікацыі іранічна прапанаваў падпісчыкам адгадаць прызначэнне гэтага аксесуара: ці гэта «абярэг ад штрафаў», ці рэжым «невідзімкі», ці проста знак «я ў гасцях».
Большасць каментатараў смеху аўтара не падтрымалі, палічыўшы такія паводзіны непавагай да іншай краіны.
«Хочуць парушаць ПДР і з'ехаць з краіны без штрафаў. Ганьбішча».
«Такія госці нам не патрэбныя».
«Гэта знак таго, што кіроўца быдла».
«На машыну хапіла, а на штраф і паркоўку грошай не засталося».
«У Гомелі за апошнія 15 гадоў заўважаю: як толькі нумары РФ, дык у 90 адсотках выпадкаў абавязкова не выконваюць ПДР. Не падабаецца мне гэтая статыстыка».
«Жыла сабе Беларусь без праблем, а потым прыехаў «старэйшы брат».
Некаторыя карыстальнікі паспрабавалі выказаць думку, што кіроўца выпадкова забыўся пальчатку пасля нейкага рамонту, аднак аўтар паста развеяў сумневы — дакладна такі ж аксесуар вісеў і на пярэднім нумары аўтамабіля.
На інцыдэнт адрэагаваў афіцыйны акаўнт сталічнай міліцыі ў Threads. Адміністратар паведаміў, што інфармацыя перададзена супрацоўнікам ДАІ для правядзення праверкі.
Гэта ўжо не першы выпадак, калі замежныя кіроўцы трапляюць у поле зроку мінскай Дзяржаўтаінспекцыі дзякуючы сацсеткам. Раней да адказнасці была прыцягнутая грамадзянка Казахстана, якая прыпаркавала машыну проста на тратуары каля «Акадэмкнігі». Падчас разбору высветлілася, што за ёй лічацца і іншыя парушэнні, уключаючы паркоўку на месцы для інвалідаў каля ГЦ «Замак» і перавозку дзіцяці без спецыяльнага крэсла.
Каментары
пдр с востока нарушает ПДР, что тут странного.