Саўладальнік венчурнага фонду Fenox Venture Capital беларускі бізнэсмэн Віталь Арбузаў запрасіў у кампанію ў якасці дарадцы былога старшыню і галоўнага выканаўчага дырэктара групы электронікі японскай карпарацыі Sony Набуякі Ідэі.
Набуякі Ідэі цяпер узначальвае кансалтынгавую кампанію ў Токіо. Мэтай супрацоўніцтва, як сказана ў афіцыйным паведамленні FVC, з'яўляецца спрыянне ў прыцягненні сродкаў японскіх інвестараў у перспектыўныя стартапы ў Сіліконавай даліне. Менавіта там з 2012 года засяроджаны галоўны венчурны бізнес Арбузава і яго партнёра па FVC Аніса Узамана. Мэтай праекта з'яўляецца інвеставанне на працягу пяці гадоў у не менш за 50 стартапаў. Збольшага ў партфоліа FVC цяпер каліфарнійскія праекты. Некаторыя з іх ужо прынеслі аддачу бізнесменам.
Таксама беларускі інвестар плануе прыцягнуць грошы японскіх кампаній у стартапы ў Паўднёва-Усходняй Азіі. У 2013 годзе Fenox Venture Capital выйшла на гэты рынак, стварыўшы супольнае прадпрыемства з японскай інвестыцыйнай кампаніяй IMJ Corporation of Japan — IMJ Fenox. Яе цэнтральны офіс месціцца ў Сінгапуры, філіі — у Джакарце і Токіа. На сёння ў партфоліа IMJ Fenox звыш дзясятка актываў у Малайзіі, Інданэзіі, на Філіпінах.
Чакаецца, што ўдзел былога топ-менеджара Sony ў бізнэсе Арбузава забяспечыць павелічэнне інвестыцый ва ўласна японскія стартапы, якія таксама ўваходзяць у сферу інтарэсаў FVC.
Каментары