Фільм Юрыя Хашчавацкага выдалены з YouTube на патрабаванне пуцінскага палітолага
YouTube заблакаваў доступ да фільма «Лабатамія».
Стужка пра расейска-грузінскую вайну была выдаленая з відэахостынгу на патрабаванні пракрамлёўскага палітолага Сяргея Кургіняна. Пра гэта сайту charter97.org распавёў рэжысёр Юры Хашчавацкі.
- Я перыядычна праглядаю самую папулярную старонку з фільмам на YouTube. Мне была цікавая дынаміка праглядаў. Калі пачаліся падзеі ва Украіне, яна вельмі моцна змянілася. Фільм глядзелі некалькі тысяч чалавек у дзень. Усяго было больш за 400 тысяч праглядаў. Я сачыў за статыстыкай, абмеркаваннем - гэта вельмі цікава для мяне.
У адзін дзень - гэта было даслоўна на наступныя дзень пасля таго, як збілі малайзійскі «Боінг» - я зайшоў на старонку і ўбачыў наступнае папярэджанне: «У сувязі з парушэннем аўтарскіх правоў відэа заблакаванае». У мяне вочы на лоб вылезлі, таму што ўсе аўтарскія правы належаць мне. Я хуценька напісаў ліст на YouTube з двума просьбамі. Першая - вярнуць у свабодны доступ фільм. Нягледзячы на тое, што выклаў яго нейкі іншы чалавек, я не меў нічога супраць гэтага і з задавальненнем назіраў за яго абмеркаваннем. Другая - паведаміць аб тым, хто пачаў «абараняць» мае аўтарскі правы. У пятніцу яны паведамілі, што заблакаваць фільм папрасіла студыя «Сутнасць часу» Сяргея Кургіняна, - сказаў Юрый Хашчавацкі.
- Ці аднавілі ваш фільм на YouTube пасля ліста?
- Фільм даступны на многіх старонках, аднак на самай папулярнай з іх яго паглядзець пакуль нельга. Цяпер мы вядзем перамовы аб тым, каб фільм быў адноўлены і на ім. Я таксама ў якасці зваротнага ходу папрасіў знаёмых запампаваць «Лабатамію» з субтытрамі на ангельскай мове - пра гэта многія прасілі.
- Некалькі дзён назад стала вядома, што ўсё той жа Сяргей Кургінян запатрабаваў выдаліць яшчэ адзін ролікпад назвай «Пуцін - падпальшчык вайны». Матывацыя тая ж - парушэнне аўтарскіх правоў. Гэта супадзенне?
- Я таксама звярнуў на гэта ўвагу. Да таго моманту я ўжо вёў перамовы з YouTube. У мяне тады ўзнікла падазрэнне, што менавіта Сяргей Кургінян датычны і да выдалення «Лабатаміі». На наступны дзень яно пацвердзілася. Падобна да кампаніі ачысткі інтэрнэту ад непажаданых відэа. Рэч у тым, што для выдалення роліка з YouTube дастаткова заявы аб парушэнні аўтарскіх правоў. Сэрвіс зыходзіць з таго, што такія заявы могуць зыходзіць толькі ад таго, хто сапраўды з'яўляецца аўтарам. А пра тое, што такія правілы будуць выкарыстоўвацца для інфармацыйнай вайны яны не думалі. У выніку многія матэрыялы пачынаюць выдаляцца з адкрытага доступу авантурыстамі тыпу Кургіняна. Мяркуючы з усяго, вельмі шмат відэафайлаў заблакаваныя такім чынам.
- 8 жніўня - гадавіна нападу Расеі на Грузію. Ваш фільм быў зняты пасля гэтых падзей. Наколькі актуальны ён у сувязі з падзеямі ў Данбасе?
- На фоне канфлікту ва Украіне колькасць праглядаў імкліва вырасла. Раней я думаў, што фільм застанецца актуальным, цяпер я ўпэўнены ў гэтым. Людзі глядзяць яго ім становіцца зразумела вельмі многае ў расейскай палітыцы. Я не збіраўся здымаць фільм-аднадзёнку па «гарачых слядах». Аб гэтым можна даведацца з навін. Я спрабаваў зразумець унутраныя спружыны таго, што адбываецца ў Расеі, адкуль бярэцца такая агрэсіўнасць ў дачыненні да суседніх краін. Матэрыял так склаўся, што ён на 100 адсоткаў тлумачыць тое, што адбываецца ва Украіне. Баюся, што фільм застанецца актуальным і далей, таму што самая Расея не спыніцца на гэтым, яе трэба спыняць. І чым хутчэй людзі гэта зразумеюць, у тым ліку, можа быць, і пасля прагляду «Лабатаміі», тым лепш.
Каментары