МУС ініцыюе шэраг змяненняў у заканадаўста па пытаннях бяспекі дарожнага руху
Па даручэнні міністра ўнутраных спраў Беларусі Ігара Шуневіча падрыхтаваны і накіраваны для разгляду ў Генеральную пракуратуру, Вярхоўны суд і Міністэрства юстыцыі законапраект, які прадугледжвае няўхільнае выкананне забароны на кіраванне транспартнымі сродкамі асобамі, якія не маюць такога права, прафілактыку такіх правапарушэнняў, паведамілі БелаПАН у МУС.
Прапаноўваецца ў выпадку кіравання ў перыяд пазбаўлення такога права тэрмін пазбаўлення падлічваць з моманту ўчынення правапарушэння. Ніжнюю мяжу штрафу за правапарушэнне — павялічыць у два разы. Выключыць магчымасць прымянення ніжняй мяжы штрафу, калі асоба ўчыняе тыя ж дзеянні паўторна на працягу года.
Для дакладу кіраўніку дзяржавы ў Адміністрацыю прэзідэнта накіраваны праект указа, які прадугледжвае дакладнае замацаванне парадку перастраення з трамвайных пуцей, пашырэнне пераліку элементаў дарогі, увядзенне новых відаў разметкі для веласіпедыстаў і шэраг іншых новаўвядзенняў.
У МУС таксама паведамілі, што сёлета ў праект пастановы Міністэрства аховы здароўя «Аб зацвярджэнні інструкцыі аб парадку абавязковага медыцынскага агляду кандыдатаў у вадзіцелі механічных транспартных сродкаў і абавязковага медыцынскага пераагляду вадзіцеляў механічных транспартных сродкаў» унесены прынцыпова новы пункт. Ён прадугледжвае, што звесткі аб асобах, прызнаных па выніках агляду і пераагляду непрыгоднымі да кіравання або маючымі патрэбу ў пазачарговым медыцынскім аглядзе, накіроўваюцца вадзіцельскімі камісіямі ў падраздзяленні ДАІ на працягу трох працоўных дзён пасля атрымання інфармацыі аб з'яўленні ў вадзіцеля медыцынскіх паказанняў да кіравання.
У Міністэрстве ўнутраных спраў нагадалі, што 28 ліпеня набыў моц закон «Аб унясенні дапаўненняў і змяненняў у некаторыя законы па пытаннях арганізацыі бяспекі дарожнага руху». Ён вызначае новыя падыходы да выяўлення парушэнняў правілаў спынення і стаянкі транспартных сродкаў з выкарыстаннем фотафіксацыі, а таксама прымусовай адбуксіроўкі і эвакуацыі транспартных сродкаў.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2121
Каментары