Масквічам раздаюць майкі з шавіністычнымі малюнкамі ў адказ на санкцыі Захаду
«Санкцыі? Не смяшыце мае Іскандэры»
Сваё абурэнне дзеяннямі Захаду цяпер можа выказаць кожны, надзеўшы дызайнерскую майку з патрыятычным малюнкам. Бясплатны абмен футболак з замежнай сімволікай на футболкі з патрыятычнымі лозунгамі праходзіць у цэнтры Масквы ля помніка Аляксандру Пушкіну.
На абмен прапануюцца, у прыватнасці, майкі з тэкстам гімна Расіі на фоне сабора Васіля Блажэннага, з малюнкам ракет «Іскандэр» і подпісам «Санкцыі? Не смяшыце мае Іскандэры», а таксама майкі з надпісам «Пасажыр з Расіі — пры санкцыях не будзіць».
Як распавяла дызайнер Анастасія Задорына, яе фірма вырабіла 30 тыс. арыгінальных футболак: «Модны адказ — санкцыям не!» (Модный ответ — санкциям нет!) — так называецца наша акцыя», — патлумачыла яна.
Сярод першых удзельнікаў акцыі — пісьменнік Алег Рой, ён абраў майку з выявай піянерскага гальштука вакол каўняра і надпісам «У нас свае прыколы без вашай кока колы».
Актрыса Вольга Кабо надзела футболку «Топаль санкцый не баіцца» з выявай мабільнага стратэгічнага комплексу. Актрыса спадзяецца, што міжнароднае супрацьстаянне хутка скончыцца. «Дзве такія творчыя краіны, як Расія і Украіна, павінны быць разам», — перакананая Каба.
Па словах аднаго з арганізатараў акцыі прэзідэнта фонду «Садзейнічанне» Ксеніі Мельнікавай, асноўная ідэя мерапрыемства — паказаць усяму свету, што «Расія санкцый не баіцца».
Мельнікава таксама распавяла, што арганізатары гатовыя даваць майкі не толькі на абмен, але і проста так, «каб людзі маглі заявіць аб сваёй патрыятычнай пазіцыі».
«Што ж тычыцца лёсу маек з замежнымі надпісамі, мы будзем іх утылізаваць, можа быць, створым арт-аб'ект», — сказала яна. Грамадскі дзеяч адзначыла, што акцыю спансуюць дзве расійскія кампаніі. Для далейшай падтрымкі, «магчыма, будзе арганізаваны народны фандрайзінг», паведаміла Мельнікава.
Як распавялі арганізатары, для шыраты ахопу і зручнасці грамадзян аўтобус акцыі будзе пераязджаць з аднаго месца на іншае. Плануецца, што ў Маскве майкі будуць мяняць два тыдні. Затым аўтобус адправіцца па рэгіёнах, у тым ліку ў Крым. А 29 верасня майкі будуць выдаваць пасажырам у аэрапорце Унукава.
Цяпер чытаюць
Цягнік Пінск—Мінск спыніўся пад Дзяржынскам без ацяплення. Пасля прыбыцця ў сталіцу пасажыраў разабралі людзі з сацсетак і развезлі па хатах6
Каментары