Далучэнне Крыма да Расеі ўхваляюць 93% крымчан, толькі 4% выступаюць супраць, высветліла маркетынгавая кампанія GfK Украіна. Сваё даследаванне ў Крыму яны праводзілі па замове кампаніі Berta Communications для ўкраінскага праекта Free Crimea.
Звыш за палову крымчан паведамілі, што пасля далучэння да Расіі іх матэрыяльнае становішча палепшала (мацней за іншых гэта адчулі пенсіянеры), больш за ўсё жыхароў паўвострава турбуюць узброены канфлікт на ўсходзе Украіны, рост цэнаў і транспартная ізаляцыя (у моладзі на першым месцы інфляцыя), а ў пачатак поўнамаштабнай вайны Расіі з Украінай вераць толькі 14% апытаных. Пры гэтым 84% крымчан глядзяць расейскія тэлеканалы, але толькі 10% ім давяраюць — у лідарах па інфармацыйным даверы сацыяльныя сеткі.
У тым, што ўкраінскія СМІ паведамляюць няпраўду пра тое, што адбываецца ў Крыме, упэўненыя амаль 80% рэспандэнтаў.
Увесну 2014 года, паводле звестак Лявада-цэнтра, далучэнне да Расіі падтрымлівалі 79% крымчан. Сацыёлагі тлумачаць рост падтрымкі эфектам вайны ў Данбасе. Жыхары баяцца, што ў выпадку, калі б анексіі не адбылося, Крым сёння таксама стаўся б зонай грамадзянскай вайны.
Адзін са стваральнікаў Free Crimea Тарас Беразавец мяркуе, што вынікі апытання тлумачацца як бояззю людзей казаць праўду, так і расчараваннем, што ўкраінскія ўлады не здольныя нічога зрабіць для праўкраінскіх насельнікаў Крыма. Ён таксама нагадвае, наколькі гнуткай бывае грамадская думка. У 1991 годзе 90% жыхароў Крыма на рэферэндуме выказалася за захаванне СССР, а ў канцы года ўжо 52% людзей прагаласавалі за незалежнасць Украіны.
Ва Украіне загінула 24-гадовая беларуская добраахвотніца Марыя Зайцава20
Каментары