Пакуль вакцына даказала эфектыўнасць на малпах.
Вынікі даследавання міжнароднай групы навукоўцаў з НДІ Скрыпса ў Каліфорніі, ЗША апублікаваныя ў часопісе Science.
Методыка навукоўцаў не проста рыхтуе імунную сістэму да сустрэчы з інфекцыяй — яна мадыфікуе ДНК, каб надаць устойлівасць клеткам да ВІЧ.
У здаровыя клеткі цягліц ужыўляецца новы раздзел ДНК, у які запісаныя «інструкцыі» па выпрацоўцы адмысловага бялку, што будзе выдавацца ў краваток і нейтралізоўваць атакі ВІЧ.
Праблема стварэння вакцыны ад ВІЧ — няспынная мутацыя вірусу, праз якую нельга падрыхтаваць арганізм да выпрацоўкі канкрэтных антыцел. Новая методыка стварае «фабрыку» актуальных у барацьбе з вірусам антыцел у самім арганізме.
Пакуль эксперыменты праводзіліся на малпах з аналагам ВІЧ — вірусам SHIV.
Вакцына паспяхова блакуе вірус цягам прынамсі 34 тыдняў, нават пры 16-кратнай дозе вірусу. Доўгатэрміновы эфект вакцыны пакуль не даследаваны.
Наступнымі этапамі стануць мадэрнізацыя вакцыны пад лекаванне ужо заражаных вірусам малпаў і тэсты на людзях. Апошняе магчыма ўжо да канца бягучага году. Навукоўцы спадзяюцца, што сродак можа не толькі бараніць ад вірусу, але і выклікаць трывалую рэмісію ўжо хворых на ВІЧ.
***
Вірус імунадэфіцыту чалавека вядомы з 1980-х гадоў. Вірус перадаецца ад чалавека да чалавека праз кроў, пры неабароненых полавых кантактах, пры выкарыстанні заражаных шпрыцоў, ад маці да дзіця, а таксама пры пашкоджанні скуры ці слізніцы. Тэрмінальная стадыя ВІЧ-інфекцыі — сіндром набытага імунадэфіцыту (СНІД). Ад яго штогод паміраюць блізу 2 мільёнаў чалавек. На сёння няма надзейнага сродку пазбаўлення ад ВІЧ.
Каментары