Апошні тыдзень кастрычніка ў Беларусі будзе цяплейшы за кліматычную норму на 3—5 градусаў. Пра гэта расказаў сіноптык Дзмітрый Рабаў у эфіры тэлеканала АНТ.
З 26 кастрычніка да 1 лістапада ў краіне захаваецца ўмерана цёплае восеньскае надвор’е, аднак яно будзе няўстойлівым. Атмасферныя франты і вільготныя паветраныя масы прынясуць дажджы і парывісты вецер.
У панядзелак, 26 кастрычніка, Беларусь закране вільготны малаактыўны атмасферны фронт. Дажджы пройдуць амаль па ўсёй краіне. Уначы тэмпература складзе ад +6 да +12 градусаў, удзень — да +9 на захадзе і да +15 на Гомельшчыне.
У аўторак, 27 кастрычніка, атмасферны фронт пачне адыходзіць на ўсход, але яго ўплыў захаваецца. Уначы кароткачасовыя дажджы магчымыя па ўсёй краіне, а раніцай і ўдзень — пераважна ва ўсходніх раёнах. Пры праясненнях уначы месцамі магчымыя замаразкі да −2 градусаў, аднак у большасці рэгіёнаў будзе ад +2 да +8. Удзень паветра прагрэецца да +7 у Віцебскай вобласці і да +12…+14 на Брэстчыне і Гомельшчыне.
У сераду, 28 кастрычніка, надвор’е будзе вызначаць вобласць высокага атмасфернага ціску разам з малаактыўным атмасферным фронтам, які прынясе лакальныя дажджы. Уначы чакаецца ад +2 да +7 градусаў, месцамі магчымыя замаразкі да −3. Удзень будзе ад +9 на поўначы да +14…+16 на поўдні Беларусі.
У чацвер, 29 кастрычніка, вільготныя паветраныя масы і вобласць высокага атмасфернага ціску абумовяць дажджлівае надвор’е амаль па ўсёй краіне. Верагодныя туманы і высокая вільготнасць. Уначы тэмпература складзе ад +2 да +8 градусаў, без замаразкаў, удзень — ад +7 на паўночным усходзе да +12 на поўдні.
У пятніцу, 30 кастрычніка, на надвор’е паўплываюць вільготнае паветра з Балтыйскага рэгіёна і вобласць высокага атмасфернага ціску. Месцамі пройдуць невялікія дажджы. Уначы і раніцай будзе ад +3 да +8 градусаў, удзень — ад +7 у паўночных рэгіёнах да +13 на паўднёвым захадзе.
У суботу, 31 кастрычніка, чакаецца пераменная воблачнасць без істотных ападкаў. Уначы тэмпература апусціцца да +2…+7 градусаў, удзень складзе +8…+13.
У нядзелю, 1 лістапада, будзе воблачна з праясненнямі. У большасці раёнаў істотныя дажджы малаверагодныя, але ўначы і раніцай чакаюцца туманы, якія могуць знізіць бачнасць да 500 метраў. Тэмпература ўначы складзе ад +4 да +9 градусаў, удзень — ад +9 у Віцебскай вобласці да +13 у Гомельскай і Брэсцкай.
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна44
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1313
Каментары