Мінабароны: У беларускай арміі не глядзяць тэлебачанне «ЛНР», там глядзяць толькі «Панараму»
Міністэрства абароны Беларусі абвяргае заявы пра тое, што салдат у войску прымушаюць глядзець тэлебачаньне «ЛНР» і расейскія тэлеканалы.
У апублікаваным учора артыкуле рэзэрвіст Зьміцер Канявец, які праходзіў вайсковыя зборы ў канцы 2014 году, распавядае, што салдат падчас палітінфармацыі змушалі глядзець расейскія каналы і тэлебачаньне «ЛНР». Афіцэры пры гэтым дазвалялі сабе антыўкраінскія выказваньні.
Начальнік упраўленьня інфармацыі галоўнага ўпраўленьня ідэалягічнай працы Міністэрства абароны палкоўнік Уладзімер Макараў заявіў Радыё Свабода, што артыкул «Нашай Нівы» — «чарговая правакацыя».
«Інфармацыя, якая ўтрымліваецца ў артыкуле, абсалютна не адпавядае рэчаіснасьці. Вайскоўцаў беларускай арміі паводле азначэньня ня могуць і не прымушаюць глядзець тэлебачаньне ЛНР. Гэта немагчыма, па-першае, таму, што ў беларускай арміі рэалізуецца ідэалёгія беларускай дзяржавы і ў распарадак дня ўключаны прагляд толькі беларускіх тэлеканалаў, у прыватнасьці, праграмы «Панарама». Ня кажучы ўжо пра адсутнасьць тэхнічнай магчымасьці прыёму там тэлебачаньня ЛНР або чагосьці падобнага», — адзначыў Макараў.
Ён заявіў, што не адпавядаюць рэчаіснасьці і іншыя тэзы артыкула — напрыклад, пра тое, што салдаты ў арміі саромеюцца размаўляць на беларускай мове, бо кажуць, што «на беларускай размаўляюць толькі сьвядомыя і адмарозкі». «Гэта ўсё хлусьня і правакацыя», — заявіў Макараў.
Ён паведаміў, што цяпер Мінабароны праводзіць праверку наконт таго, ці сапраўды служыў Зьміцер Канявец у войску, але пакуль пацьверджаньня гэтай інфармацыі няма.
Адказваючы на пытаньне, ці існуюць нейкія зацьверджаныя кіраўніцтвам падыходы да размовы з салдатамі наконт падзеяў ва Ўкраіне, Макараў падкрэсьліў, што гэтыя падыходы цалкам адпавядаюць афіцыйнай пазыцыі Аляксандра Лукашэнкі.
«Ёсьць афіцыйная пазыцыя кіраўніка беларускай дзяржавы, якая цудоўна выкладзена ў шматлікіх публікацыях — гэта і ёсьць тое, што можна казаць (салдатам). Яшчэ раз падкрэсьліваю: мы рэалізуем ідэалёгію беларускай дзяржавы, ідэалёгію і палітыку кіраўніка дзяржавы Аляксандра Рыгоравіча Лукашэнкі», — заявіў ён.
* * *
Ад Рэдакцыі
Дадзены артыкул даслаў чытач. Матэрыял вылучаецца грунтоўнасцю, і няма падставаў яму не давяраць. Думаецца, сп.Макараў проста не зразумеў, што гаворка ідзе пра сюжэты, знятыя баевікамі «ЛНР», і паказаныя на расійскіх каналах. А чаму салдатам даюць — змушаюць! — глядзець расійскія каналы — гэта, сапраўды, вялікае пытанне. І няправільна, спадару Макараў, адразу ў лоб казаць, што гэтага няма. Разбярыцеся спачатку, праверце.
Былы беларускі міліцыянер шукае «пародзістую прыгажуню». Называе сябе мільянерам, а сам судзіцца з былой жонкай за аліменты21
Каментары