«Ахова птушак Бацькаўшчыны» прапануе беларусам паназіраць за вяртаннем пералётных птушак
Грамадская арганізацыя «Ахова птушак Бацькаўшчыны» (АПБ) прапануе беларусам далучыцца да міжнароднай адукацыйнай кампаніі «Жывая вясна» і паназіраць за вяртаннем пералётных птушак у родныя мясціны.
У гэтым годзе спецыялісты арганізацыі прапанавалі назіраць за прылётам з цёплых краін такіх птушак, як белы бусел, вясковая ластаўка, звычайная зязюля, чорны свіргуль, а таксама шчурка-пчалаедка. «Рэгулярна бывайце на прыродзе, і, калі вы ўбачыце або пачуеце адну з названых птушак, інфармацыю пра гэта неабходна ўнесці на сайт springalive.net», — звярнуліся ў АПБ да беларусаў.
Акрамя таго, распавесці аб сваіх назіраннях можна ў групах праекта ў сацыяльных сетках або даслаць смс-паведамленне на кароткі нумар 0841 з указаннем імя, прозвішча, часу назірання, месца, колькасці і віду птушак.
«Галоўная мэта кампаніі «Жывая вясна» — сабраць дадзеныя аб тым, як пералётныя птушкі вяртаюцца ў Еўропу, і далучыць да назірання за імі і прыродай наогул як мага больш жыхароў нашай краіны. Нават калі вы да гэтага не назіралі за птушкамі, ніколі не позна пачаць. Дзякуючы гэтым назіранням кожны год мы можам бачыць розніцу ў часе прылёту птушак у розныя гарады і параўнаць, як розныя фактары (напрыклад, змена надвор'я) уплываюць на час іх прылёту. Дарэчы, у мінулым годзе наша краіна заняла 4-е месца па колькасці назіранняў з 52 краін-удзельніц», — падкрэслілі ў арганізацыі.
АПБ таксама правядзе два конкурсы: «Лепшае фота «Жывой вясны» (не мае ўзроставых абмежаванняў) і «Ідэальны сад для птушак» (конкурс малюнкаў для дзяцей да 16 гадоў).
Міжнародны праект «Жывая вясна» быў арганізаваны BirdLife International, у Беларусі яго праводзіць грамадская арганізацыя «Ахова птушак Бацькаўшчыны». Праект родам з Германіі, дзе першая кампанія адбылася ў 1987 годзе ў Баварыі. Цяпер акцыя праводзіцца партнёрамі BirdLife International больш чым у 40 краінах свету. У 2012 годзе «Жывая вясна» стала самай паспяховай у гісторыі праекта: у ёй было зарэгістравана больш за 173 тыс. назіранняў.
Цяпер чытаюць
У Пскове расіянін забіў беларуса Валерыя за тое, што той патрабаваў паважаць беларускую нацыю6
Каментары