Пракуратурай Мінскай вобласці ў абласны суд накіраваная крымінальная справа ў дачыненні да неаднаразова судзімага 45-гадовага жыхара Барысаўскага раёна. Злачынства было ўчыненае ў верасні 2014 года.
Як паведаміў намеснік начальніка аддзела абласной пракуратуры па наглядзе за выкананнем заканадаўства УСК па Мінскай вобласці Таццяна Находка, мужчына абвінавачваецца ва ўчыненні наўмыснага забойства з асаблівай жорсткасцю 83-гадовага аднавяскоўца і ў замаху на наўмыснае знішчэнне і пашкоджанне маёмасці шляхам падпалу, якія пацягнулі прычыненне ўрону ў асабліва буйным памеры.
Папярэдняе расследаванне гэтай крымінальнай справы праводзілася УСК па Мінскай вобласці.
Паводле выстаўленага абвінавачання мужчына, вызваліўшыся летам 2014 года з месцаў пазбаўлення волі, у адзін з дзён верасня, знаходзячыся ў стане алкагольнага ап'янення, зайшоў у дом да састарэлага аднавяскоўца, з якім быў знаёмы з дзяцінства. Падчас сваркі, што ўзнікла паміж імі, мужчына нанёс пажылому чалавеку шматлікія ўдары рукамі, нагамі і нажніцамі ў вобласць галавы, тулава і рук, пасля чаго здушыў шыю пацярпелага рукамі, прычыніўшы цяжкія цялесныя пашкоджанні ў выглядзе закрытай чэрапна-мазгавой траўмы: кровазліцця ў мяккія тканкі галавы і галаўнога мозгу, пералому пад'язычнай косці і храсткоў гартані, кровазліцця ў галасавую звязку і мышцу языка. Ад атрыманых траўм пацярпелы памёр на месцы.
Жадаючы замесці сляды забойства, абвінавачаны падпаліў дом, а таксама маёмасць у ім на агульную суму больш як 260 млн рублёў. Давесці злачынства да канца ён не змог, бо агонь убачылі аднавяскоўцы і выклікалі пажарных.
За наўмыснае забойства састарэлай асобы, учыненае з асаблівай жорсткасцю, можа быць прызначанае пакаранне ў выглядзе пазбаўлення волі да 25 гадоў, ці пажыццёвага зняволення, ці смяротнай кары.
Крымінальным заканадаўствам за замах на наўмыснае знішчэнне маёмасці, учыненае агульнанебяспечным спосабам, якое пацягнула прычыненне ўрону ў асабліва буйным памеры, прадугледжана да 12 гадоў пазбаўлення волі.
Цяпер чытаюць
Як асабістая доктарка Лукашэнкі вучыць беларусаў цаніць радзіму, а сама скупляе люкс і адпачывае на Блакітным Беразе ШМАТ ФОТА39
Як асабістая доктарка Лукашэнкі вучыць беларусаў цаніць радзіму, а сама скупляе люкс і адпачывае на Блакітным Беразе ШМАТ ФОТА
На Афоне адшукалі тры невядомыя раней асобнікі Астрожскай Бібліі. Для яе стварэння друкар Іван Фёдараў, выхадзец з Беларусі, выкарыстоўваў тэксты Скарыны44
Каментары