Як і ў мінулым годзе, па-беларуску ў Беларусі выходзіць кожная дзясятая кніга.
Паводле звестак Нацыянальнага статыстычнага камітэту, у 2014 годзе доля выдадзеных па-беларуску найменняў кніг і брашур засталася нязменнай: 9,5%.
З 11613 найменняў кніг і брашур па-беларуску выдадзена 1105, па-руску — 9572. Адзінкавыя выданні выходзілі на старажытнагрэцкай, персідскай, славацкай і туркменскай мовах.
Агулам за год было выдадзена 31,2 млн асобнікаў кніг і брашур, што меней за мінулы год на 0,2 млн. Доля беларускамоўных кніг па накладзе не названая.
За апошнія 15 год сумарны наклад выдадзеных у Беларусі кніг і брашур неспынна змяншаецца, з 2000 года скараціўся на 49%.
Пра долю беларускамоўных кніг у мінулым годзе міністр інфармацыі Уладзімір Матусевіч казаў: «Шмат гэта ці мала, сказаць цяжка. Напэўна, гэта столькі, колькі таго сёння патрабуе рынак».
Асноўная маса кніг і брашур, выдадзеных у Беларусі — навучальная (29% ад агульнай колькасці друкаваных адзінак), навучальна-метадычная (18,2%) і навуковая ды навукова-папулярная літаратура (18,2%). Дзіцячая літаратура складае 9% ад агульнай колькасці выдадзеных кніг, літаратурна мастацкія выданні — 7,9%.
За год у Беларусі стала меней газет — мінус 5% найменняў і мінус 10 млн асобнікаў пры агульным гадавым накладзе ў 445,4 млн асобнікаў.
У параўнанні з 2013 годам наклад часопісаў і іншых перыядычных выданняў павялічыўся на 3,3%. З 921 часопіса па-беларуску было 132 (14%).
Цяпер чытаюць
Стаў вядомы прысуд экс-памочніку Лукашэнкі Ігару Брыло4
Каментары