Жылы раён спраектаваны так, каб зрабіць фізічную актыўнасць натуральнай часткай штодзённага жыцця.
На востраве Фахід у Абу-Дабі да 2029 года плануюць стварыць новы жылы раён больш чым на 6 тысяч дамоў і кватэр. Як піша CNN, яго галоўная асаблівасць — не раскошная нерухомасць, а гарадское асяроддзе, спраектаванае так, каб заахвочваць людзей да больш здаровага ладу жыцця.
Праект коштам 40 мільярдаў дырхамаў ААЭ (каля 10,9 мільярда долараў) рэалізуе кампанія Aldar Development, якая належыць ураду Абу-Дабі. Забудова зойме тэрыторыю плошчай каля 2,7 мільёна квадратных метраў паміж раёнамі Яс і Саадыят.
Ідэя такога праекта грунтуецца на канцэпцыі так званай «архітэктуры добрага стану» (wellness architecture), якая прадугледжвае праектаванне будынкаў і гарадской прасторы такім чынам, каб яны спрыялі фізічнаму, эмацыйнаму і псіхічнаму здароўю чалавека.
Навуковыя даследаванні сапраўды паказваюць, што асяроддзе, у якім жывуць людзі, можа ўплываць на іх здароўе. Апублікаванае сёлета даследаванне навукоўцаў Масачусецкага тэхналагічнага інстытута (MIT) паказала, што жыхары раёнаў, дзе зручна хадзіць пешшу, шмат зялёных зон і добра развітая грамадская прастора, у сярэднім маюць лепшыя паказчыкі фізічнага і псіхічнага здароўя.
Сярод найбольш спрыяльных элементаў гарадскога планавання даследчыкі называюць кароткія кварталы, зручную сетку вуліц, паркі і разнастайнасць аб'ектаў у пешай даступнасці.
Будаўнікі вострава Фахід плануюць дасягнуць гэтых мэтаў закладкай у цэнтры вострава парку працягласцю 10 кіламетраў. Тут з'явяцца бегавыя дарожкі, тры веламаршруты і зоны адпачынку. Парк таксама будзе аддзяляць жылыя кварталы ад пляжаў і мангравых лясоў, выконваючы ролю візуальнага і гукавога буфера.
Уздоўж 11‑кіламетровай берагавой лініі пабудуюць тры жылыя комплексы — ад шматкватэрных дамоў да вілаў. Жылыя кварталы злучыць сетка пешаходных маршрутаў агульнай працягласцю 15 кіламетраў. Больш за 70% дарожак будуць знаходзіцца ў цені, што павінна зрабіць перамяшчэнне пешшу больш камфортным нават у сквар.
На востраве таксама адкрыецца філія брытанскай прыватнай школы King's College School Wimbledon. Забудоўшчык заяўляе, што гэта будзе першая ў свеце школа, сертыфікаваная па стандарце Fitwel — сістэме ацэнкі будынкаў і гарадскіх тэрыторый паводле іх уплыву на здароўе людзей. Сам востраў ужо атрымаў найвышэйшы трохзоркавы сертыфікат гэтай праграмы.
Стваральнікі праекта лічаць, што здаровы лад жыцця залежыць не толькі ад наяўнасці спартзалы або спа-комплексу, але і ад таго, наколькі лёгка чалавеку зрабіць карысны выбар у штодзённым жыцці — прайсціся пешшу, сустрэцца з людзьмі або правесці час на свежым паветры.
Каментары