У Казахстане за некалькі дзён загадкава загінула пад 100 тысяч сайгакаў
За хвілю страчаная амаль траціна папуляцыі. Такога не бывала ні з якім відам.
Каля 100 тысяч антылоп-сайгаў, альбо сайгакаў, загінула з загадкавых прычын у Казахстане. Калі сітуацыя не выправіцца, рэдкі від жывёл можа знікнуць у бліжэйшыя тыдні, піша IFLScience.
Падзёж раптоўна пачаўся ў сярэдзіне мая і пакуль не спыніўся. Від, што і так знаходзіўся ў крытычным стане (катэгорыя CR паводле Міжнароднага саюзу аховы прыроды), пад пагрозай вымірання. Чаму — загадка.
80-85 тысяч памерлых сайгакаў — прыблізная лічба на пятніцу, 22 мая, па Кастанайскай вобласці Казахстана. Вядома, што на той дзень больш за 7 тысяч сайгакаў загінула ў Акмалінскай Акцюбінскай абласцях.
Агулам казахская папуляцыя налічвала на 2014 год 256 тысяч. Значна меншая папуляцыя сайгакаў ёсць у Расіі і Манголіі, адтуль звестак пра падзёж не паступала.
Магчымай прычынай падзяжу называецца эпідэмія пастэрэлёзу, інфекцыйнай хваробы, што ўзнікае праз зніжэнне натуральнай супраціўляльнасці арганізму да ўзбуджальнікаў інфекцый. Але незразумела, чаму хвароба, і так распаўсюджаная сярод сайгакаў, магла б прывесці да масавай — і раптоўнай — гібелі.
Як сцвярджаюць у міністэрстве сельскай гаспадаркі Казахстана, выміранні сайгакаў здараліся і раней, але ніяк не ў такіх маштабах. Раптоўнае выміранне траціны папуляцыі за некалькі дзён — беспрэцэдэнтнае здарэнне не толькі для сайгакаў, але і для любых жывых істот.
Некалі сайгакі жылі на агромністай тэрыторыі ад Карпатаў да Манголіі і Кітая. Сучасныя арэалы двух падвідаў у параўнанні з ранейшымі — ледзь заўважныя кропкі. Але з сярэдзіны XIX стагоддзя да 1920-х чалавек практычна знішчыў сайгакаў. У 1950-х папуляцыю атрымалася часткова ўзнавіць і давесці да 2 млн, але да 2010 года праз браканьераў (цэняцца мяса і рогі) яна зменшылася да 12 тысяч.
Гэта не адзінае анамальнае знікненне жывых істот, якому чалавецтва не можа знайсці тлумачэння. Нешта цягам некалькіх год знішчае пад палову пчаліных вулеяў у ЗША.
Цяпер чытаюць
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі4
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары