Элан Маск зробіць паездкі на звышхуткасных цягніках бясплатнымі
Плаціць прыйдзецца хіба ў гадзіны пік.
Высокахуткасны цягнік-«трубаправод» Hyperloop, прыдуманы стваральнікам SpaceX і Tesla Эланам Маскам, мае быць пратэставаным у рэальным свеце ўжо ў 2016 годзе. Як распавёў Wired дырэктар праекту Дырк Альбарн, паездкі на ім могуць стаць бясплатнымі.
«Я насамрэч шчыра веру, што калі мы створым сетку Hyperloop і зробім яе бясплатнай прынамсі ў няпікавыя гадзіны, а ў пікавыя будзем браць невялікую плату, а зарабляць будзем на іншым, гэта сур’ёзна зменіць жыццё людзей», — сказаў ён.
Зрабіць транспарт бясплатным можна праз выкарыстанне аднаўляльных крыніц энергіі. Гэта не толькі забяспечыць энергіяй цягнікі, але і пакіне залішак, які можна будзе прадаваць.
Hyperloop фінансуецца па прынцыпе пошуку спажыўцоў — праектам ужо зацікавіліся 350 кампаній з 21 краіны свету, больш за 400 інвестараў уклалі свае грошы.
Першы камерцыйны трэк будзе каштаваць мільярды даляраў. Да пачатку яго будаўніцтва будзе створаны тэставы 8-кіламетровы трэк у Квэй-Вэлі, Каліфорнія. Цягнікі на ім будуць хадзіць з хуткасцю, блізкай да траціны хуткасці гуку, у канчатковай версіі хуткасць Hyperloop мае быць звыш за 1000 км/г.
На тэставым трэку будзе адпрацоўвацца не столькі хуткасць — будзе аптымізаваная сістэма пасадкі пасажыраў у капсулы (іх плануецца запускаць кожныя 30 секунд) і руху саміх капсул (пасажыры маюць адчуваць хуткасць не як у самалёце, а як у машыне).
У выпадку поспеху ў ЗША Hyperloop плануюць збудаваць на Бліжнем Усходзе, у Азіі і Еўропе.
Цяпер чытаюць
«Як толькі чуюць пра Расію — дык усё… У чым праблема?» У Мінску не хочуць здаваць кватэру чалавеку з расійскім пашпартам14
Каментары