Расійскія нацыянал-бальшавікі, прадстаўнікі партыі «Другая Расія», лідарам якой з’яўляецца Эдуард Лімонаў, сцвярджаюць, што сёння праніклі на тэрыторыю латвійскай вайсковай базы ў Адажы і паднялі над тэрыторыяй сцяг колераў так званай «георгіеўскай стужкі».
Гэта фота нацболы прыводзяць у якасці доказу
Аб гэтым паведаміла прэс-служба партыі «Другая Расія», а таксама і сам Лімонаў у сваім блогу.
Як зазначаюць удзельнікі акцыі, ім вельмі лёгка ўдалася пранікнуць на вайсковую базу Адажы і нават сарваць амерыканскі сцяг, замяніўшы яго на свой:
«Нацболы пералезлі праз сцяну базы па лесвіцы. Пры гэтым ім удалося сарваць амерыканскі сцяг. На тэрыторыі часткі нацболы разгарнулі георгіеўскі сцяг і змаглі прайсці па пляцы аж да будынка штаба базы, дзе былі затрыманыя вартавымі».
Латвійскія СМІ пакуль пра гэты інцыдэнт не паведамляюць.
Таксама нацыянал-бальшавікі апублікавалі «зварот да ЗША», патлумачыўшы акцыю тым, што на базе размешчаныя амерыканскія вайскоўцы, а таксама адбываюцца буйныя міжнародныя вучэнні НАТА «Saber Strike 2015».
«Мы, грамадзяне Расіі, лічым гэтыя дзеянні прамой пагрозай для нашай краіны. Мы патрабуем, каб амерыканскія ваякі сышлі з Прыбалтыкі, а яшчэ лепш — зусім з Еўропы. Наша акцыя носіць мірны, папераджальны характар. Але ЗША павінны ведаць, што рускія людзі не пацерпяць ваеннага шантажу і пагроз», — гаворыцца ў звароце.
Пакуль таксама не паведамляецца, як на такія дзеянні адрэагавалі латвійскія вайскоўцы і ці быў нехта затрыманы па выніку акцыі. У вучэннях НАТА «Saber Strike 2015», якія праходзяць на тэрыторыі краін Балтыі і Польшчы з 1 па 26 чэрвеня, прымаюць удзел больш за тысячу вайскоўцаў з усіх краін Альянса.
