У Віцебску збіраюцца рабіць тэхнапарк на тэрыторыі завода «Віцязь»
Частку тэрыторыі віцебскага завода тэлевізараў «Віцязь» плануюць выкарыстаць для будаўніцтва гарадскога тэхнапарка. Пра гэта 24 снежня падчас наведвання Віцебскай вобласці паведаміў старшыня праўлення Нацыянальнага банка Раман Галоўчанка.
Паводле слоў Рамана Галоўчанкі, у Беларусі варта пашыраць досвед тэхнапарка, створанага на базе Мінскага матацыклетна-роварнага завода, і Віцебск не павінен заставацца ўбаку ад гэтых працэсаў. Пакуль пытанне знаходзіцца на пачатковым этапе разгляду, але, як адзначыў чыноўнік, праца будзе весціся даволі хутка.
Цяпер, па словах Галоўчанкі, аблвыканкам звярнуў увагу кіраўніцтва «Віцязя» на наяўнасць лішніх плошчаў, якія не выкарыстоўваюцца. Іх прапануюць альбо перапрафіляваць, альбо знесці.
Таксама плануецца такая схема, пры якой банкі будуць непасрэдна ўключаныя ў праект і часткова стануць удзельнікамі тэхнапарка. Гаворка ідзе не толькі пра фінансаванне стварэння інфраструктуры, але і пра падтрымку стартапаў, якія будуць развівацца на гэтай пляцоўцы.
Ацэньваючы эканамічную сітуацыю ў рэгіёне ў цэлым, кіраўнік Нацбанка адзначыў, што Віцебская вобласць працуе ў складаных умовах, аднак мае істотны патэнцыял для росту. Асобную ўвагу, паводле яго, неабходна надаць прадпрыемствам з хранічнымі фінансавымі праблемамі, па якіх трэба прымаць нялёгкія, але неабходныя рашэнні.
«У пашпарце бабулі стаіць дата нараджэння 00.00.1945» — «А ў маёй XX.XX.1940». Як такое можа быць?2
Каментары