Міністэрства ўнутраных спраў не адмаўляе наяўнасці ў Беларусі радыкальных маладзёжных неанацысцкіх груповак — скінхедаў і ім падобных. Пра гэта заявіў, адказваючы на пытанне БелаПАН, намеснік начальніка ўпраўлення прафілактыкі — начальнік аддзела арганізацыі прафілактыкі правапарушэнняў непаўналетніх МУС Беларусі Андрэй Саладоўнікаў 19 лютага на прэс‑канферэнцыі ў Мінску.
«На шчасце, сітуацыя з падобнымі групоўкамі ў Беларусі кантралюемая. Такія групоўкі ёсць, але яны малаколькасныя, кепска арганізаваныя і не карыстаюцца папулярнасцю ў падрастаючага пакалення», — сказаў ён.
А.Саладоўнікаў паведаміў, што каля года таму ў Беларусі былі зафіксаваныя факты збівання кітайскіх студэнтаў.
«Пры гэтым былі падставы меркаваць, што злачынцы маюць дачыненне да скінхедаў: па іх знешнім выглядзе, лозунгах, што яны выкрыквалі, і г.п. Аднак даказаць іх дачыненне да скінхедаў даволі складана, і іх дзеянні былі расцэнены як хуліганства», — зазначыў прадстаўнік МУС.
Разам з тым, запэўніў А.Саладоўнікаў, «усе мяркуемыя ўдзельнікі падобных груповак знаходзяцца пад кантролем як органаў МУС, так і КДБ». Паводле яго слоў, супрацоўнікі праваахоўных органаў таксама працуюць з футбольнымі фанатамі — «дастаткова сур’ёзнай дэструктыўнай сілай».
«Вопыт іншых краін паказвае, што менавіта з ліку футбольных фанатаў выходзіць большасць скінхедаў», — сказаў А.Саладоўнікаў.
Цяпер чытаюць
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы1616
Каментары