ЗАТ «Плацежная сістэма БЕЛКАРТ» звяртае ўвагу трымальнікаў плацежных картак з міжнародным статусам БЕЛКАРТ-Maestro на з'яўленне новага спосабу махлярства з карткамі — шымінг. Пра гэта паведамілі ў аддзеле па сувязях з грамадскасцю прадпрыемства.
«Пакуль што шымінг да Беларусі не дабраўся, таму непакоіцца трэба толькі ўладальнікам картак з міжнародным статусам, якія карыстаюцца за мяжой банкаматамі. У Беларусі ж большую небяспеку па-ранейшаму ўяўляе скімінг», — адзначылі спецыялісты.
Галоўнае адрозненне шымінгу ад скімінгу — гэта немагчымасць распазнаць прыладу першага простым вокам. Яна ўяўляе сабой тонкую плату, якая ўстаўляецца ў картрыдар і счытвае з банкаўскай карткі інфармацыю.
Скімер выглядае як накладка, унутры якой знаходзіцца прылада, якая счытвае інфармацыю з магнітнай паласы плацежнай карткі. Далей счытаная інфармацыя махлярамі выкарыстоўваецца для вырабу дубліката карткі. Звычайна скімеры мацуюцца на банкамат. Каб даведацца ПІН-код, махляры выкарыстоўваюць скрытыя відэакамеры і накладныя клавіятуры.
«Трэба разумець, што і скімер распазнаць нялёгка. Яны бываюць розныя, і якасць выканання дарагіх мадэлей мала чым адрозніваецца ад арыгінала. Трымальнікі банкаўскіх картак павінны памятаць: толькі пільнасць і ўважлівасць дапамогуць пазбегнуць крадзяжоў грошай з рахунку», — канстатавалі спецыялісты.
У аддзеле па сувязях з грамадскасцю парэкамендавалі выкарыстоўваць банкаматы, якія знаходзяцца ў гандлёвым цэнтры, аддзяленні банка або ў грамадскім месцы, якое добра праглядаецца. Акрамя таго, не трэба перадаваць свой PIN-код, даваць карыстацца карткай. Таксама неабходна падключыць паслугу SMS-паведамленне, якая дасць магчымасць быць у курсе несанкцыянаванага спісання сродкаў з рахунку.
Паводле даных прадпрыемства, у Беларусі ўвесь картачны партфель ацэньваецца ў 12,5 млн картак, з іх 5,2 млн прыпадае на БЕЛКАРТ.
Цяпер чытаюць
«На канцэртах няма месца радыкальнаму нацыяналізму, агрэсіі і гвалту». Макс Корж выказаўся наконт скандалу, які разгарэўся пасля яго выступу ў Варшаве3737
Каментары