Галоўная рэдактарка «Белсата» знялася ў фільме-фаварыце Канскага кінафестываля
На Канскім кінафестывалі 14 мая адбылася прэм’ера фільма «Бацькаўшчына» (Fatherland) польскага рэжысёра Паўла Паўлікоўскага — уладальніка «Оскара» за фільм «Іда» 2015 года.
«Бацькаўшчына» — чорна-белы нямецкамоўны польска-нямецка-італьянска-французскі біяграфічны фільм, які расказвае пра вяртанне славутага антыфашыста, уладальніка Нобеля па літаратуры Томаса Мана і ягонай дачкі журналісткі Эрыкі ў зруйнаваную Германію пасля Другой сусветнай вайны, піша «Белсат».
Як гэта — паглядзець у вочы айчыне, якая стала монстрам і атрымала паразу?
Крытыкі ў захапленні ад фільму. Паводле агрэгатару Rotten Tomatoes, фільм мае 95% рэйтынгу «свежасці» — гэта вельмі высокі паказнік, які значыць, што фільм спадабаўся амаль усім крытыкам. Сярэдняя ацэнка, паводле Metacritic, 9 з 10.
У цэнтры сюжэту падарожжа праз Нямеччыну лаўрэата Нобэлеўскай прэміі ў літаратуры Томаса Мана і ягонай дачкі Эрыкі пасля 16 гадоў у выгнанні. Іх ролі выканалі Ганс Цышлер (Ганс са спілбергаўскага «Мюнхена») і Сандра Хюлер (Эва з нядаўняга «Праекту Авэ Марыя», а таксама галоўная гераіня ў «Анатоміі падзення» і «Зоне камфорту»).
У эпізадычнай ролі ў фільме знялася галоўная рэдактарка «Белсату» Аліна Коўшык. Яна расказвае, што пабачыла абвестку аб кастынгу: шукалі людзей пэўнага выгляду, якія ўмеюць танчыць. Выслала заяўку — і атрымала SMS: «Спадар рэжысёр Паўлікоўскі адабраў Вас на гэтую ролю, запрашаем на здымкі».
Здымкі эпізоду трывалі тры дні, адбываліся ў варшаўскім Палацы культуры і навукі.
Аліна Коўшык расказвае: «Мая галоўная матывацыя была ў тым, каб паглядзець, як ствараецца вялікае кіно выбітнымі рэжысёрамі. Гэта вельмі шматпавярховы, добра зарганізаваны працэс. Рэжысёр вельмі патрабавальны да кожнага кадру, які пераздымаецца некалькі разоў з заангажаваннем вялікай колькасці людзей».
На здымачнай пляцоўцы яна пазнаёмілася з амерыканскім акторам, з якім грала ў эпізодзе, і бачыла на пляцоўцы некаторых беларусаў.
Цэлага фільму Аліна Коўшык яшчэ не бачыла: пакуль была толькі прэм’ера ў Канах. Але спадзяецца паглядзець неўзабаве.
«Я лічу, што Павел Паўлікоўскі — адзін з найвыбітнейшых польскіх і сусветных рэжысёраў гэтага часу, — кажа Аліна Коўшык. — Я люблю ягоныя ранейшыя фільмы — гэта і «Халодная вайна», і «Іда». Так што была радая стаць часткаю гэтага працэсу! І цікава, што шмат людзей, якія гралі ў масоўцы, прыходзілі туды менавіта з любові да кіно».
Канскі кінафестываль пачаўся 14 мая.
У польскіх кінатэатрах «Бацькаўшчына» выйдзе 19 чэрвеня. Пракату ў Беларусі не анансавалі.
Беларусы горача спрачаюцца, ці варта прывязваць дапамогу на дзіця да заробку маці51
Беларусы горача спрачаюцца, ці варта прывязваць дапамогу на дзіця да заробку маці
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1313
Каментары
[Зрэдагавана]