АБСЕ са жніўня мінулага года зафіксавала больш за 20 машын з надпісам «груз 200», якія перасякалі расейска-ўкраінскую мяжу, паведамляе РІА Новості са спасылкай на кіраўніка місіі ў Растоўскай вобласці Поля Пікара.
«Машыны з надпісам «груз 200» праязджаюць праз мяжу, альбо проста лічбы «200». Усяго за год праехала 21 такая труна», — сказаў Пікар на прэс-канферэнцыі.
Пікар адзначыў, што супрацоўнікі АБСЕ дакладна не ведаюць, што ў іх знаходзілася, бо грузавікі ехалі зачыненымі. «Газэлі» з трунамі праязджалі як у бок Украіны, так і ў бок Расіі, дадаў ён.
У апошняй справаздачы спецыяльнай маніторынгавай місіі АБСЕ ад 2 жніўня гаворыцца аб магчымым знаходжанні ў Данбасе «служачых паветрана-дэсантнай брыгады з Арэнбурга». Аўтары дакладу спасылаюцца на заяву збройнага ахоўніка склада з боепрыпасамі на тэрыторыі самаабвешчанай Данецкай народнай рэспублікі, які заявіў, што разам з іншымі ахоўнікамі служыць у 16-й паветрана-дэсантнай брыгадзе з Арэнбурга. Пры гэтым, адзначаецца ў справаздачы, ніякіх апазнавальных знакаў на форме мужчыны не было.
У Крамлі паабяцалі праверыць гэтую інфармацыю, адзначыўшы, што ў адрас Расіі неаднаразова гучалі «галаслоўныя абвінавачванні» у адпраўцы ў Данбас ваеннаслужачых, але «кожны раз на паверку высвятлялася, што ні пра што канкрэтнае гаворка не ідзе». Масква адмаўляе любы ўдзел Узброеных сіл РФ у канфлікце на ўсходзе Украіны.
Цяпер чытаюць
Загінуў беларускі добраахвотнік Васіль «Дзір» Рапіцкі11
Каментары