Чакаем 2017 год.
NASA і партнёры абвясцілі склад наступных дзвюх экспедыцый на МКС. Беларус Алег Навіцкі вернецца ў космас у 2017 годзе.
У складзе 51-й экспедыцыі разам з Алегам Навіцкім палятуць расейцы Аляксандр Місуркін і Мікалай Ціханаў, амерыканка Пэгі Уітсан і француз Тама Песке.
У наступнай, 52-й экспедыцыі ад ESA паляціць Паола Неспалі, ад NASA — Марк Вандэ Хэй і Джэк Фішэр, ад Раскосмаса — застануцца Місуркін і Ціханаў, да іх далучыцца Фёдар Юрчанка.
Падчас экспедыцый будзе праведзеная важная работа для пракладання чалавецтву дарогі на Марс, палёты на МКС у ходзе экспедыцыі могуць здзяйсняцца, калі атрымаецца здабыць сродкі, на новых караблях Boeing CST-100.
Алег Навіцкі ўжо быў у космасе ў складзе экспедыцыі МКС-33, выляцеў 23 кастрычніка 2012 года і вярнуўся 16 сакавіка 2013-га.
Як ляцеў тады, так і паляціць цяпер ад імя расійскага касмічнага агенцтва (Роскосмас), афіцыйна з’яўляецца лётчыкам-касманаўтам Расійскай Федэрацыі і Героем Расіі.
У кастрычніку гэтага года Навіцкі справіць 44-годдзе. Нарадзіўся пад мінскам у горадзе Чэрвені, у 1988 годзе паступіў у расійскую Ваенна-паветраную акадэмію імя Жукоўскага і Гагарына, у 1994-м атрымаў кваліфікацыю лётчыка-інжынера. Дзесяць год служыў лётчыкам у Паўночна-Каўказскай ваеннай акрузе. З 2006 года стаў кандыдатам у касманаўты. У 2012 годзе стаў камандзірам дублюючага экіпажа «Саюз ТМА-04М», затым той склад быў зацверджаны як асноўны ўжо для карабля «Саюз ТМА-06М».
Жанаты, мае 19-гадовую дачку Яну.
Каментары