Былому топ-менеджару ProStore і IT-кампаніі далі тры гады калоніі па палітычным артыкуле
Ілля Дзіндзікаў працаваў на кіраўнічых пасадах у вядомых кампаніях. Нядаўна яго асудзілі па палітычным крымінальным артыкуле.
Іллю Дзіндзікаву 35 гадоў. Ён родам з аграгарадка Юшавічы Нясвіжскага раёна.
У 2008‑м Ілля паехаў вучыцца ў Мінск. У 2013 годзе скончыў Інстытут журналістыкі БДУ па спецыяльнасці «аўдыёвізуальныя СМІ», а пазней дадаткова павышаў кваліфікацыю ў Брытанскай вышэйшай школе дызайну.
Яшчэ студэнтам, у 2012 годзе, Ілля пачаў працаваць інтэрнэт-маркетолагам і капірайтэрам у кампаніях «Альбіён Груп», PublicGroup і ARTOX. Адразу пасля ўніверсітэта, у 2013-м, ён зарэгістраваў ІП і стварыў уласны праект fmb.by — «першы маркетынгавы буцік у Беларусі». Паралельна мужчына працаваў кантэнт-дырэктарам у сервісе «Асістэнт» і брэнд-менеджарам у Esiga Group. З 2014 па 2016 год ён займаў пасаду вядучага спецыяліста ўпраўлення маркетынгу ў МТБанку.
Да пачатку 2020‑га Дзіндзікаў быў намеснікам начальніка ўпраўлення праграм лаяльнасці ў «Еўрагандлі», а пасля год узначальваў аддзел маркетынгу гіпермаркетаў ProStore. У 2021 годзе Ілля кіраваў праектам у «Аўтастронг-М», быў дырэктарам па маркетынгу ў «Аўтапрамсэрвісе», дзе выводзіў брэнд Nissan на рынак Беларусі, а затым стаў вядучым спецыялістам па маркетынгу у банку «Рашэнне».
Апошнім вядомым месцам ягонай працы са жніўня 2022‑га да лютага 2024 года была IT-кампанія Softvoya, дзе ён кіраваў напрамкам Customer Success. Яго задача была ўтрымаць кліентаў, павысіць іх лаяльнасць да брэнда і знізіць верагоднасць таго, што яны адмовяцца ад паслуг кампаніі.
Кар'ера перарвалася праз палітычны пераслед. У мінулым годзе мужчыну затрымалі і змясцілі ў СІЗА.
Нядаўна Мінскі гарадскі суд вынес яму прысуд паводле частак 1 і 2 артыкула 361‑4 Крымінальнага кодэкса Беларусі (садзейнічанне экстрэмісцкай дзейнасці).
Дзіндзікаву прызначылі 3 гады калоніі.
«Наша Нiва» — бастыён беларушчыны
ПАДТРЫМАЦЬ
Каментары