На галоўным рынку сталіцы веснавое ажыўленне. Людзі снуюць паміж скрынкамі і латкамі клубніц, абмяркоўваюць «салодкая — не салодкая», выбіраюць, нюхаюць, быццам на дварэ канец мая. Tochka.by распавядае, што цяпер выгадна купляць.
На Камароўцы поўным ходам ідзе гандаль. Усё большы становіцца выбар гародніны і садавіны.
Нават у працоўны час людзей тут шмат: хтосьці прыходзіць мэтанакіравана, некаторыя — проста паглядзець, але ў выніку ўсё роўна сыходзяць з пакетамі.
Клубніцы пакуль не беларускія
Садавіну і ягады завозяць на рынак бесперапынна. Вышэй за ўсё зараз попыт на клубніцы. Цана на іх ужо прыкметна знізілася. За кілаграм просяць ад 13,9 рублёў, хоць пару тыдняў таму было каля 40 рублёў.
Праўда, ягады імпартныя, беларускія не знайшлі.
У размове з адным з прадаўцоў высветлілася, што ў гэты час нашых ягад на Камароўцы апрыёры быць не можа.
«Што вы? Беларускія клубніцы?! Зараз — не, я іх яшчэ не бачыла», — запэўнівае прыемная дзяўчына.
На ўдакладняльнае пытанне, калі ж з'явіцца, прадавец адказала, што «праз месяц-паўтара». Пачакаем, а пакуль паядзім грэцкія.
Агулам фруктовыя шэрагі выглядаюць бадзёра. Да прыкладу, яблыкі (самы спакойны варыянт) каштуюць 2,5—7 рублёў за 1 кг.
Грушы даражэйшыя, у сярэднім па 7—10 за кіло. Вінаграду шмат, яго можна купіць за 4,8—20 рублёў. Чым прыгажэйшыя гронкі, тым вышэйшая цана.
Цэннікі на цытрусавыя таксама радуюць. Некаторыя апельсіны прадаюць усяго па два рублі за кілаграм, ёсць і дарагія — за 18,9 рубля. Мандарыны каштуюць у межах 3,9—15 рублёў, лімоны — ад 6 рублёў.
Самая цікавая цана на ананасы. Даражэзны, але «вельмі смачны» варыянт каштуе 45 рублёў за 1 кг, а хтосьці прадае ўсяго па два. Атрымліваецца разбежка больш чым у 22 разы!
Ёсць і танныя персікі — ад 3,9 рубля за кілаграм, элітныя — па 25. На ківі таксама вялікая розніца: ад 3 рублёў да 40 рублёў за 1 кг.
Маркетынг з прывітаннем
У цэлым разбег па цэнах на садавіну прыкметны. Часам на суседніх прылаўках адрозненне ў некалькі разоў — і гэта нармальна: рынкавая эканоміка. Камароўка — наогул не пра «дзе танней», а ў «каго і што бярэш».
Кожны прадавец сам вырашае, як яму завабліваць пакупнікоў: адны — цэнамі, а іншыя — асартыментам.
На рынку ёсць месцы, дзе садавіну прадаюць па акцыі. Цэннік там адзін да аднаго, прадаўцы ўсе прыязныя і вельмі хваляць за агляды. Часта просяць зняць пабольш і расказаць пра іх тавар падрабязней.
Але ёсць прылаўкі з экзатычным таварам, дзе, напрыклад, прадаюць буякі з Паўднёвай Амерыкі па 180 рублёў за 1 кг, чарэшню па 230 і бананы па 35 рублёў. Тут ужо пачынаюцца праблемы.
Здымка «залатых» цэннікаў выклікае агрэсію, скрыўленыя твары, папрокі і грандыёзныя істэрыкі, якія пераходзяць у скандал. А довады, што на рынку фатаграфаваць афіцыйна можна і гэта вітаецца, не працуюць.
Дарэчы, на гэтых прылаўках не ўсюды пазначана цана гародніны і садавіны. Некаторыя прадаўцы ў парушэнне правіл гандлю нахабна хаваюць цэннікі. А любая заўвага з гэтай нагоды выклікае неверагодную агрэсію — і пачынаецца гандаль у стылі 1990-х.
Гароднінныя шэрагі — тэрыторыя спакою
Цэны на гародніну вельмі стабільныя. Самая танная бульба каштуе 1,09 за 1 кг, ёсць варыянты «больш салідныя» — за 2,5—3 рублі. Прадаўцы запэўніваюць, што менавіта з іх бульбы атрымліваюцца «самыя шыкоўныя дранікі».
На некаторых прылаўках ужо ёсць маладыя караняплоды па касмічнай цане — 15 за кіло.
Моркву прадаюць па 0,9—4 рублі за 1 кг. Але самая танная — гэта абрубкі, якія трэба адразу выкарыстоўваць, бо яны не захоўваюцца і хутка гніюць.
Можна выгадна купіць буракі, яны прадаюцца ад 0,99 за кілаграм. Але ёсць і маладыя, іх прывезлі з Азербайджана і хочуць прадаць па 15 рублёў.
На цыбулю цана стандартная — 1,59—3,5 рубля.
З'явілася шмат радыскі па 9,9—12 за 1 кг, таксама завезлі маладую капусту па 3,5—5,9 рубля.
Добры выбар таматаў. Простыя варыянты будуць ад 6 за кілаграм, імпартныя чэры — па 30 рублёў.
Агуркі, як правіла, беларускія. Іх можна набыць па 4,9—8,9 рубля за 1 кг. А вось баклажаны і кабачкі яшчэ імпартныя — прыкладна па 10. Гэта тычыцца і перцаў, іх прадаюць па 6,9—15 рублёў.
На часнок цана асабліва не мяняецца — 13,9—25 рублёў за кіло. Вельмі шмат зеляніны. Яна паступова таннее, зараз цана стартуе ад 15 за 1 кг.
Рэзюмуем: сезонны рынак прачнуўся, людзей стала больш, асартымент ужо амаль вясновы. Ну а цэны, як заўсёды, з характарам. Прадаўцы — тым больш.
Цяпер чытаюць
Вынеслі прысуд Паліне Зыль — блогерцы, якая стала нулявым пацыентам справы Гаюна, бо ў яе знайшлі тую самую спасылку ад Матолькі13
Каментары