На таргі выставілі некалькі карцін Шагала. Адну з іх ужо прадалі за $3,6 мільёна
Аўкцыённыя дамы Christie’s і Sotheby’s пачалі Ганконгскую серыю таргоў сучасным мастацтвам. Сярод лотаў традыцыйна для Азіяцкага рэгіёна ёсць некалькі карцін Марка Шагала. Адну з іх ужо прадалі за $3,6 мільёна, піша Office Life.
Першыя Ганконгскія таргі сучасным мастацтвам у гэтым сезоне прайшлі на пляцоўцы аўкцыённага дома Christie’s. Падчас таргоў з малатка за $3,6 мільёна з улікам камісіі аўкцыённага дома пайшла карціна «Пастараль» Марка Шагала. Першапачаткова яе ацэньвалі ў $2,9—4,2 мільёна.
Марк Шагал напісаў гэту карціну ў 1975 годзе на піку свайго позняга творчага перыяду. Характэрна, што гэту работу выстаўлялі ў Луўры падчас выставы, прысвечанай 90‑годдзю мастака. На гэтай карціне Шагала ёсць усе характэрныя для яго работ вобразы. Пры гэтым у выглядзе зялёнага скрыпача, які лунае над Віцебскам, мастак, хутчэй за ўсё, адлюстраваў самога сябе.
Яшчэ адну карціну Марка Шагала паспрабуюць прадаць 28 сакавіка. Мастак напісаў «Жыццё» ў 1964 годзе, калі яму было 76 гадоў. У гэты час ён разважаў пра сваё жыццё і адлюстраваў на палатне вобразы, якія паўтараюцца і вызначаюць яго мастацкі стыль.
Цэнтральнае месца ў карціне займае цырк. Шагал любіў яго з дзяцінства і ў сваіх успамінах неаднаразова расказваў пра вандроўных акцёраў, якія прыязджалі ў Віцебск. Мастак часта атаясамліваў сябе з клоўнам, які хавае далікатнасць, спачуванне і ўразлівасць пад маскай усмешкі.
Карціну памерам 56,5 на 78 см ацэньваюць у $612—870 тысяч. Паведамляецца, што сапраўднасць гэтай працы пацвердзілі ў камітэце Марка Шагала.
Яшчэ адну работу мастака будуць прадаваць 30 сакавіка падчас Вячэрняга аўкцыёну сучаснага мастацтва ад Sotheby’s. Шагал напісаў «Закаханых ў Парыжы» ў 1982 годзе. На карціне ён адлюстраваў двух закаханых, якія слухаюць ігру скрыпача на фоне сімвала Парыжа.
Работу памерам 46 на 38 см ацанілі ў $230—485 тысяч. Камітэт Марка Шагала таксама пацвердзіў яе сапраўднасць.
У Віцебску здаецца ў арэнду будынак, у якім вучыўся Марк Шагал
Вясной у Мінск прывязуць карціну Шагала
Балет пра Марка Шагала паставяць у Вялікім тэатры
Успаміны Бэлы Шагал паказваюць нечаканы Віцебск. І раскрываюць яшчэ адну таямніцу карцін Шагала
На аўкцыёне карціну Шагала прадалі за 3 мільёны даляраў
Каментары