Беларусь экстрадавала ў Расію дырэктара фірмы, які абвінавачваецца ў растраце пры будаўніцтве касмадрома «Усходні».
Бізнэсмен быў затрыманы ў Мінску 1 чэрвеня па запыце расійскага боку. У Расіі супраць яго распачатая крымінальная справа па артыкуле «прысваенне або растрата ў асабліва буйным памеры».
Як заяўляла МУС Беларусі, на думку следства, фірма затрыманага была адным з падрадчыкаў на будаўніцтве касмадрома ў Амурскай вобласці, «атрымала перадаплату ў суме каля 4 млн рублёў ($65,6 тыс.), якая была выдаткаваная на фінансава-гаспадарчую дзейнасць, не звязаную з будаўніцтвам аб'екта».
Арышт бізнэсмена ў Мінску прыцягнуў увагу тым, што ён ездзіў у аўтамабілі «мерседэс», цалкам пакрытым стразамі «Свароўскі» (машына належала яго знаёмаму).
Касмадром «Усходні» ў Прыамур'і павінен стаць асноўнай стартавай пляцоўкай для запускаў расійскіх касмічных ракет. Яго будаўніцтва суправаджалася шэрагам скандалаў, звязаных з нявыплатай зарплаты рабочым. Яны некалькі разоў аб'яўлялі галадоўку ў знак пратэсту супраць дзеянняў працадаўцаў, а таксама звярталіся да прэзідэнта Расіі Уладзіміра Пуціна.
Генпадрадчык будаўніцтва таксама скардзіўся на непагашаны Раскосмасам доўг у 20 млрд рублёў.
Завяршыць будаўніцтва планавалася да 30 лістапада гэтага года, аднак пасля візіту Пуціна на будпляцоўку дату першых магчымых запускаў перанеслі на вясну 2016 года.
Цяпер чытаюць
Адвакат Дзмітрый Лепрэтар расказаў пра белыя плямы ў справе аб тэракце ў метро11
Каментары