На парламенцкіх выбарах у Швейцарыі перамогу атрымала правакансерватыўная Швейцарская народная партыя, якая выступае за жорсткую міграцыйную палітыку.
Партыя, заручыўшыся падтрымкай 29,5% выбаршчыкаў, атрымала 65 дэпутацкіх мандатаў з 200 у Нацыянальнай радзе, на 11 месцаў больш у параўнанні з выбарамі 2011 года.
43 дэпутацкія мандаты засталіся за Сацыял-дэмакратычнай партыяй Швейцарыі.
Швейцарская народная партыя выступае за абмежаванне іміграцыі і ўвядзенне міграцыйных квот, а таксама барацьбу з ісламізацыяй і абарону нейтралітэту Швейцарыі.
Папулярнасць партыі і яе праграмы прыкметна вырасла за апошнія месяцы на фоне міграцыйнага крызісу ў Еўропе.
«Галасаванне было паказальным. Людзі занепакоеныя масавай міграцыяй у Еўропу», - пракаментаваў вынікі выбараў лідар партыі Тоні Брунэр.
У 2009 годзе па ініцыятыве Швейцарскай народнай партыі ў краіне прайшоў рэферэндум аб забароне будаўніцтва ў краіне мінарэтаў. Тады прапанову партыі падтрымалі 57,5% выбаршчыкаў.
У 1992 годзе партыя апынулася фактычна адзіным супернікам далучэння Швейцарыі да Еўрапейскай эканамічнай супольнасці.