У судзе Навабеліцкага раёна Гомеля пачаўся суд над мужчынам, які нападпітку знявечыў жанчыну ў аўтобусе «Гомель — Цагельня».
Інцыдэнт адбыўся ў кастрычніку мінулага года. У аўтобусе 56-гадовы мужчына, які быў моцна п’яны, пачаў чапляцца да 8-гадовага хлопчыка, патрабуючы, каб той саступіў яму месца. За хлопчыка ўступілася маці — і атрымала ўдар у твар. Аднак гэтага п’янаму пасажыру не хапіла, ён дастаў сцізорык і параніў твар жанчыны. У гэты момант на прыпынку адчыніліся дзверы аўтобуса, і мужчына выбег з салона. Неўзабаве ён быў затрыманы міліцыяй і арыштаваны.
Свае дзеянні падазраваны тлумачыў вялікай колькасцю выпітага - маўляў, гарэлка ва ўсім вінаватая. Абвінавачанаму інкрымінуецца пагроза забойствам і наўмыснае прычыненне цяжкага цялеснага пашкоджання з хуліганскіх меркаванняў. Мужчына можа атрымаць да 10 гадоў пазбаўлення волі.
Каментары