Арыштаваны Баскін, дырэктар «Сэрвалюкса». «Кампанія працуе, тавар адгружаецца»
Яўген Баскін (злева) і Юрый Чыж, фота ced.by
У Мінску ходзіць інфармацыя пра затрыманне Яўгена Баскіна, генеральнага дырэктара групы кампаній «Сэрвалюкс».
«Наша Ніва» звярнулася ў кампанію, каб пацвердзіць ці абвергнуць гэтую інфармацыю. Факта затрымання яны не абверглі, але і не пацвердзілі.
«Кампанія працуе, тавар адгружаецца, людзі занятыя», — адказалі яны нам.
— А ці Баскін на месцы?
— Я не магу вам сказаць. Але Яўген быў, ёсць і будзе гендырэктарам кампаніі.
Такі адказ мы атрымалі.
Пазней у КДБ пацвердзілі гэтую інфармацыю.
«Учора затрыманыя 15 службовых асобаў «Сэрвалюкса». Шкода ад іх супрацьпраўнай дзейнасці не менш за 370 млрд рублёў. Асноўнага ўладальніка кампаніі Яўгена Баскіна затрымалі ў аэрапорце пры спробе вылету за мяжу», — заявіў Вакульчык журналістам 15 сакавіка.
Нагадаем, што ў мінулую пятніцу быў затрыманы ўладальнік «Трайпла» Юрый Чыж.
Баскін быў сябрам Чыжа. Вядома, што Баскін прысутнічаў на вяселлі ягонага сына.
Баскін — адзін з самых паспяховых і уплывовых бізнэсоўцаў Беларусі.
Што Баскіну інкрымінуюць, пакуль невядома.
У канцы мінулага года крымінальныя справы былі заведзеныя ў дачыненні да дзвюх буйных структур, якія займаліся, як і Баскін, вытворчасцю кармоў і імпартам кармавых дабавак — «Біякома» сенатара Андрэя Паўлоўскага і «Консула» братоў Гільманаў і Віктара Раўкова. Яны абвінавачваюцца ва ўхіленні ад выплаты падаткаў.
Акрамя таго, ідзе суд над экс-дырэктаркай Віцебскай бройлернай птушкафабрыкі сенатаркай Ганнай Шарэйка, якую лічылі канкурэнткай Баскіна.
Цяпер чытаюць
Перасцярогі перад «новымі Жыткавічамі». Кіеў дарма бачыць пагрозу ў будаўніцтве мастоў цераз Прыпяць і Мухавец21
Каментары