Адпаведны зварот быў уручаны часоваму паверанаму ў справах Беларусі ў ЗША.
Адпаведны зварот быў уручаны часоваму паверанаму ў справах Беларусі ў ЗША 25 красавіка. Адказу на яго пакуль няма, паведамілі БелаПАН у пасольстве ЗША ў Мінску.
Зварот амерыканскага знешнепалітычнага ведамства, патлумачылі ў дыпмісіі, выкліканы станам здароўя Э.Зельцэра: «За час пакуль беларускія ўлады ўтрымліваюць Зельцэра ў няволі, стан яго здароўя значна пагоршыўся».
Як паведаміла БелаПАН консул Злучаных Штатаў Кэралайн Сэвэдж, 25 красавіка яна сустракалася з Э.Зельцэрам. Консул заявіла, што стан яго здароўя і ўмовы ўтрымання выклікаюць «сур’ёзныя апасенні»: ён вельмі схуднеў, аслабеў, яму цяжка хадзіць, размаўляць. Так, паводле слоў К.Сэвэдж, Зельцэр паведаміў ёй, што «на другі і трэці дзень затрымання яго збівалі».
Па выніках наведвання Э.Зельцэра амерыканскі консул накіравала справаздачу ў Вашынгтон, пасля чаго ў Дзярждэпартамент быў запрошаны беларускі часовы павераны.
Начальнік аддзела прэс‑службы МЗС Беларусі Марыя Ваньшына пацвердзіла БелаПАН сам факт сустрэчы ў Дзярждэпартаменце, аднак адмовілася канкрэтызаваць яе змест.
Пасольства ЗША таксама звяртае ўвагу, што «спатрэбіўся амаль месяц рэгулярных запытаў для таго, каб атрымаць магчымасць зноў наведаць затрыманага амерыканца, чые праблемы са здароўем дакументальна пацверджаны». Першая сустрэча з ім адбылася 27 сакавіка.
28 красавіка брат арыштаванага Марк Зельцэр накіраваў па факсе звароты да прэзідэнта Беларусі Аляксандра Лукашэнкі і генеральнага пракурора Рыгора Васілевіча, у якіх заклікаў «захаваць жыццё Эмануілу Зельцэру». Ён таксама ўказаў, што, паводле яго інфармацыі, «Барыс Беразоўскі не хоча дапусціць магчымае вызваленне Зельцэра і рыхтуе забойства Эмануіла або яго «натуральную» смерць, абвінаваціўшы ў гэтым Беларусь».
Эмануіл Зельцэр і яго сакратар Уладлена Функ былі затрыманы пасля прылёту ў Мінск 12 сакавіка. Ім інкрымінуецца выкарыстанне заведама падробных дакументаў групай людзей. Паводле слоў адваката затрыманых Дзмітрыя Гарачкі, следства працягваецца, а справа мае статус дзяржаўнай тайны.
Цяпер чытаюць
31‑гадовы расіянін акруціў 17‑гадовую беларуску. Фінал гісторыі страшны: турма за наркотыкі, смерць дзіцяці, «СВА» і скрадзеныя грабавыя3
Каментары