Штат пасольства ЗША ў Мінску папоўніцца эканамічным дарадцам. Пра гэта заявіў сёння на брыфінгу для 12 амерыканскіх кампаній Павераны ў справах ЗША Скот Роланд, паведамілі ў амерыканскай амбасадзе. Такім чынам, цяпер у Беларусі будзе сем пастаянных дыпламатаў з ЗША пры васьмі дазволеных МЗС.
«Скот Роланд адзначыў, што ўрад ЗША падтрымлівае развіццё гандлю і інвестыцый паміж ЗША і Беларуссю, і дадаў, што ў рамках такіх сумесных намаганняў Міністэрства замежных спраў ўхваліў пашырэнне штату пасольства ЗША ў Мінску на пасаду эканамічнага дарадцы», — адзначылі ў пасольстве.
Раней аб хуткім з'яўленні ў Беларусі сёмага амерыканскага дыпламата паведаміў кіраўнік Джэймстаўнскага фонду Глен Ховард.
На сённяшнім брыфінгу бізнес-дэлегацыя ЗША была прадстаўлена 12-ю кампаніямі, якія працуюць у рэгіёне і вывучаюць магчымасць пашырэння іх дзейнасці на Беларусь. Мерапрыемства прайшло «у цесным супрацоўніцтве» з беларускім МЗС, дадалі ў пасольстве.
Дэлегацыя сустрэлася з намеснікам кіраўніка МЗС Аляксандрам Міхневічам, прадстаўнікамі Нацыянальнага агенцтва па інвестыцыях і прыватызацыі і нацыянальнага банка Беларусі.
«Бізнес-брыфінг таксама даў магчымасць кампаніям ЗША пазнаёміцца з патэнцыяльнымі беларускімі партнёрамі», — адзначылі ў пасольстве.
***
Нагадаем, у сакавіку 2008 года, пасля ўвядзення ЗША санкцый у дачыненні да канцэрна «Белнафтахім», пасол Беларусі Міхаіл Хвастоў быў адкліканы з Вашынгтона для кансультацый, а Мінск па патрабаванні беларускага боку пакінула пасол Карэн Ст'юарт. Колькасць амерыканскіх дыпламатаў у Мінску было скарочана з 35 да пяці супрацоўнікаў.
У 2014 годзе беларускі бок дазволіў павялічыць штат амбасады ЗША з пяці да шасці чалавек, і неўзабаве пасля гэтага амерыканскае дыппрадстаўніцтва пашырыла спіс візавых паслуг для грамадзян Беларусі.
Падчас свайго візіту ў Мінск 29 сакавіка намесніца памочніка міністра абароны ЗША Майкл Карпэнтэр заявіў, што бакі рыхтуюцца абмяняцца вайсковымі аташэ.
25 красавіка 2016 года часовы павераны ЗША Скот Роланд заявіў, што вяртанне паслоў можа стаць тэмай для абмеркавання паміж Мінскам і Вашынгтонам ўжо ў гэтым годзе.
Цяпер чытаюць
Пракуратура пра смерць Мелказёрава: журналіст меў хранічную хваробу8
Каментары