Марцін Оберг: У Беларусі і Швецыі ёсць усе шанцы развіваць узаемапаважлівы дыялог

Сёння ў Беларусі і Швецыі ёсць усе шанцы развіваць узаемапаважлівы дыялог, з якога можа вырасці паразуменне, а затым і згода, заявіў БелаПАН шведскі пасол Марцін Оберг. Вяртанне даверу паміж краінамі дыпламат лічыць агульнай заслугай абедзвюх дзяржаў.

«Давер паміж Беларуссю і Швецыяй, які ўдалося вярнуць за час майго знаходжання тут, гэта не асабіста мая заслуга, а наша з вамі агульная, — адзначыў ён. — Гэта самае галоўнае, чаго я як дыпламат дамогся. На гэтай базе можна будаваць адносіны і развіваць іх у розных сферах, ад палітычнай і эканамічнай да культурнай. Я таксама думаю, што гэта дазволіць нам выбудаваць дыялог, як і належыць паміж добрымі суседзямі, як у пытаннях агульнай згоды, так і там, дзе нашы думкі разыходзяцца».

Оберг выказаў шкадаванне з нагоды астуджэння адносін дзвюх краін чатыры гады таму. «Мне вельмі шкада, што так адбылося, але думаю, было б не вельмі прадуктыўна каго-небудзь вінаваціць у гэтым. Больш важна — глядзець наперад і знайсці базу, з якой мы можам развіваць нашы адносіны далей, знайсці згоду і паразуменне нават у тых сферах, дзе, магчыма, нашы погляды не супадаюць», — сказаў дыпламат.

На яго думку, пачатак да наладжвання адносін ужо пакладзены.

«Перш за ўсё, гэта ўзаемапаважлівы дыялог, — лічыць Оберг. — І мы прыйшлі сёння да таго, што можам проста сказаць адзін аднаму, што мы думаем. Гэта першы крок, ад якога можа развівацца паразуменне і нават расці згода».

***

Нагадаем, у жніўні 2012 года паміж Мінскам і Стакгольмам адбыўся дыпламатычны канфлікт. Прычынай стала рашэнне беларускіх уладаў не працягваць акрэдытацыю шведскаму паслу Стэфану Эрыксану, якога Мінск абвінаваціў у дэструктыўнай дзейнасці. У адказ шведскія ўлады заявілі, што не прымуць новага пасла Беларусі, і рэкамендавалі двум супрацоўнікам беларускага пасольства пакінуць Стакгольм. 30 жніўня абодва пасольствы спынілі сваю працу. Функцыі шведскага пасольства ў Мінску выконвала дыппрадстаўніцтва Эстоніі, беларускага ў Стакгольме — пасольства Латвіі.

Вясной 2013 года беларускі бок задаволіў просьбу шведскага і акрэдытаваў у Мінску часовага паверанага ў справах Швецыі ў Беларусі.

Марцін Оберг з ліпеня 2013 года працаваў у Мінску ў рангу часовага паверанага ў справах Швецыі ў Беларусі, а ў канцы красавіка 2015 года быў прызначаны паслом. Пасля гэтага прызначэння дыпламат заявіў, што Швецыя вітала б адкрыццё беларускага пасольства ў Стакгольме, але канчатковае рашэнне за Беларуссю.

• 0
• 0
• 0
• 0
• 0