Беларуска-індыйскім адносінам неабходна надаць дадатковы імпульс. Пра гэта Аляксандр Лукашэнка заявіў у Ташкенце на сустрэчы з прэм'ер-міністрам Індыі Нарэндрай Дамадардасам Модзі.
«Нашы адносіны развіваюцца даволі дынамічна. Але ў апошнія гады я адчуваю, што патрэбен дадатковы імпульс і штуршок да развіцця гэтых адносін», — цытуе Лукашэнку прэс-служба прэзідэнта.
Ён адзначыў, што ў ходзе візіту прэзідэнта Індыі ў Беларусь, які адбыўся некаторы час таму, бакі дамовіліся аб тым, каб прыкладна да 2018 года дасягнуць узроўню тавараабароту ў 1 млрд. долараў. «Натуральна, пад гэты мільярд нам трэба стварыць нейкую эканамічную дарожную карту, каб дасягнуць гэтай мяжы», — заявіў кіраўнік дзяржавы.
Паводле яго слоў, паміж Беларуссю і Індыяй створана дастатковая дагаворна-прававая база, каб адносіны маглі паспяхова развівацца. Бакі таксама рэалізуюць шэраг сур'ёзных двухбаковых праектаў, у прыватнасці ў сферы фармакалогіі і па іншых кірунках. «У нас вельмі добра развіваецца супрацоўніцтва паміж акадэміямі навук. Навукова-тэхнічныя праекты ў сферах энергетыкі, космасу, «зялёнай індустрыі», нана- і біяіндустрыі, робататэхнікі, фармацэўтыкі, атамнай энергетыкі атрымалі сваё развіццё паміж Індыяй і Беларуссю, — адзначыў Лукашэнка. — Мы сур'ёзна рыхтуемся да таго, каб у лістападзе 2016 года наведаць міжнародны гандлёвы кірмаш у Нью-Дэлі, дзе ўжо сёння запланавана правядзенне Дзён беларускай навукі ў Індыі».
«Словам, у нас ёсць добрыя кірункі супрацоўніцтва, але я лічу, што на гэтым спыняцца нельга. Трэба рухацца наперад. І мы, вядома ж, чакаем вашай большай прысутнасці ў цэнтры Еўропы. Для вялікай Індыі гэта будзе нядрэнна, і мы гатовы рэалізаваць вашы інтарэсы ў Беларусі настолькі, наколькі гэта вам выгадна», — дадаў ён.
Сустрэча кіраўнікоў Беларусі і Індыі прайшла ў Ташкенце, дзе сёння яны возьмуць удзел у пасяджэнні савета кіраўнікоў дзяржаў — членаў Шанхайскай арганізацыі супрацоўніцтва.
Каментары