Сярэдні ўзрост жыхароў Беларусі з 1990-га павялічыўся на пяць гадоў — да 40,1 года
На пачатак 2016 года сярэдні ўзрост жыхароў Беларусі з 1990 года павялічыўся на пяць гадоў і складае 40,1 года (у мужчын — 37,3 года, жанчын — 42,5 года). Такія звесткі ўтрымліваюцца ў аглядзе Нацыянальнага статыстычнага камітэта да Сусветнага дня народанасельніцтва, які адзначаюць 11 ліпеня.
Паводле звестак Белстата, сярэдні ўзрост беларускага гараджаніна за 25 гадоў павялічыўся на 6,8 года і склаў 38,8 года. За гэты перыяд вясковец пасталеў на 3,2 года і яго сярэдні ўзрост склаў 44,5 года.
Віцебская вобласць — самы узроставы рэгіён краіны. Сярэдні ўзрост жыхароў вобласці складае 41,5 года. Самым маладым рэгіёнам з`яўляецца Мінск, дзе сярэдні ўзрост складае 38,3 года.
Чаканая працягласць жыцця ў Беларусі за апошнія пяць гадоў павялічылася на 3,5 года і склала ў 2015-м 73,9 года.
Колькасць насельніцтва краіны на пачатак 2016 года склала 9 млн. 498 тыс. Беларусь па гэтым паказчыку займае 92-е месца ў свеце, 17-е месца сярод еўрапейскіх дзяржаў, 6-е — сярод краін СНД.
На пачатак 2016 года ў Беларусі пражывала 5 млн. 77 тыс. жанчын і 4 млн. 421 тыс. мужчын. На 1.000 мужчын прыпадала 1.149 жанчын, у тым ліку ў гарадской мясцовасці — 1.167, у сельскай — 1.086.
Самым шматлікім па колькасці жыхароў з`яўляецца Мінск, у ім пражывае 1 млн. 960 тыс. чалавек, або кожны пяты жыхар краіны (20,6%).
Сярод абласцей найбольш заселеная Гомельская, дзе пражывае амаль кожны сёмы жыхар краіны.
Як адзначыў Белстат, агульнасусветная тэндэнцыя ўрбанізацыі характэрная і для сучаснай Беларусі. Тры чвэрці яе насельніцтва — гараджане. На пачатак гэтага года колькасць гарадскога насельніцтва склала 7 млн. 370 тыс. чалавек.
Прыблізна 70% гарадскога насельніцтва сканцэнтраванае ў буйных гарадах з колькасцю насельніцтва 100 тысяч і больш. Гэта Мінск, усе абласныя цэнтры, а таксама Бабруйск, Баранавічы, Барысаў, Пінск, Орша, Мазыр, Салігорск, Наваполацк, Ліда.
Сусветны дзень народанасельніцтва адзначаюць штогод 11 ліпеня. У гэты дзень ў 1987 годзе колькасць насельніцтва Зямлі перавысіла пяць мільярдаў чалавек.
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары