Брытанскі суд прыгаварыў 20-гадовую жыхарку англійскага графства Кент да трох гадоў турмы за абразлівыя твіты ў адрас маці дзіцяці, забітага ў пачатку 1990-х.
Хлоя Коўэн прызнаная вінаватай у пераследзе чалавека, што прычыніла пацярпелай сур'ёзныя душэўныя пакуты. У судзе абвінавачаная цалкам прызнала віну.
У якасці дадатковага пакарання суд забараніў абвінавачанай на працягу наступных 10 гадоў карыстацца прыладамі з інтэрнэтам, якія не могуць аўтаматычна захоўваць ўсю гісторыю яе дзеянняў. Ёй таксама будзе забаронена ўваходзіць у любы кантакт з сям'ёй загінулага.
Падставай для судовага разбіральніцтва сталі грубыя і абразлівыя паведамленні ў «Твітары», якія Коўэн адпраўляла маці двухгадовага Джэймса Балджэра, забітага амаль чвэрць стагоддзя таму двума школьнікамі. У гэтых твітах яна прыкідвалася то адным з забойцаў, то прывідам загінулага.
Забойства двухгадовага Джэймса Балджэра адбылося ў 1993 годзе. Маці ненадоўга пакінула яго без нагляду ў супермаркеце, пасля чаго двое іншых дзяцей — Джон Венеблс і Роберт Томпсан — выкралі яго, збілі і кінулі паміраць на чыгуначных рэйках.
Школьнікі спрабавалі замаскіраваць забойства пад няшчасны выпадак, але камера відэаназірання ў супермаркеце зафіксавала момант выкрадання Балджэра. Абодва абвінавачаныя ў яго забойстве былі затрыманыя і атрымалі максімальна магчымы для іх узросту тэрмін пазбаўлення волі — 10 гадоў.
Цяпер чытаюць
Каб не сядзець у Расіі за наркотыкі, малады даносчык з Ашмянаў запісаўся на фронт. Дый згінуў11
Каментары