Супрацоўнікі 11 упраўлення ГУБАЗіК МУС 22 лістапада затрымалі чацвярых маладых людзей, якіх падазраюць у вандалізме. Як паведамляецца, завадатару — 19 гадоў, трое яго змоўшчыкаў — непаўналетнія. Усе яны вучацца ў мясцовых каледжах.
Памятны знак забітым у вайну габрэям аблілі чорнай фарбай у суботу, 19 лістапада, каля 2:00.
Падазраваныя прытрымліваюцца ўльтраправых ідэй нацызму і з'яўляюцца ўдзельнікамі нефармальнага руху магілёўскіх скінхэдаў. Адзін з іх на працягу гэтага года ўжо двойчы прыцягваўся да адміністрацыйнай адказнасці па арт. 17.10 КоАП Рэспублікі Беларусь (прапаганда і (або) публічнае дэманстраванне, выраб і (або) распаўсюджванне нацысцкай сімволікі або атрыбутыкі).
Выбар месца і аб'екта для цынічнай выхадкі планаваўся загадзя. Прыкладна месяц вандалы вывучалі мясцовыя славутасці і памятныя для габрэяў месцы. Правядзенне «акцыі» было прымеркавана да суботы — святочнага дня іўдзеяў.
Магілёўскі міжраённы аддзел Следчага камітэта завёў крымінальную справу па ч.2 арт. 339 КК Рэспублікі Беларусь (хуліганства, здзейсненае групай асоб). Праводзяцца далейшыя аператыўна-следчыя мерапрыемствы. Правяраецца дачыненне зламыснікаў да здзяйснення іншых злачынстваў.
Памятны знак з высечанымі на ім далонямі магілёўскія габрэі ўсталявалі на вуліцы Лазарэнкі ў 2008 годзе. На яго месцы ў жніўні 1941 году нацысты збіраліся зрабіць уваход у гета, але ў кастрычніку яны забілі зняволеных габрэяў. З дзесяці тысяч ацалелі адзінкі. Сродкі на памятны знак габрэі збіралі талакой.
Цяпер чытаюць
Памятаеце былога памежніка, які стаў дальнабойшчыкам і ў Германіі прызнаваўся ў любові да Лукашэнкі? З ім бяда34
Каментары