Усе паліклінікі Мінска пачалі выдаваць электронныя рэцэпты, паведаміла намеснік начальніка галоўнага ўпраўлення — начальнік аддзела першаснай медыцынскай дапамогі Міністэрства аховы здароўя Людміла Жылевіч.
«У Мінску сёння 100 працэнтаў паліклінік забяспечваюць выдачу электронных рэцэптаў. Многія пацыенты атрымалі пластыкавую картку для медыцынскага абслугоўвання, якая з'яўляецца важным элементам тэхналогіі абарачэння электронных рэцэптаў. Паліклінікі ідуць з ініцыятывай да пацыента, каб тыя скарысталіся гэтай паслугай», — сказала Людміла Жылевіч.
У абласцях да электроннага рэцэпта далучыліся 28 паліклінік. У далейшым паліклінічныя ўстановы будуць паэтапна далучацца да сістэмы электроннага рэцэпта па меры іх інфарматызацыі. «Вядзецца планавая работа, якая датычыцца тэхнічнага боку ўкаранення электроннага рэцэпта. Плануецца, што поўная інфарматызацыя паліклінік будзе завершана да 2020 года», — адзначыла намеснік начальніка галоўнага ўпраўлення.
Выдача пластыкавай карткі ажыццяўляецца ў рэгістратуры паліклінік па месцы абслугоўвання. Для яе атрымання неабходна пры сабе мець пашпарт, а таксама падпісаць форму інфармаванай згоды пацыента аб выкарыстанні пластыкавай карткі для медыцынскага абслугоўвання. Картка з'яўляецца ўласнасцю паліклінікі і перадаецца пацыенту на бязвыплатнай аснове. Укараненне сістэмы «Электронны рэцэпт» забяспечыць аптымізацыю абслугоўвання насельніцтва ў паліклініках і аптэках горада.
У цэлым стратэгія развіцця інфармацыйнага грамадства да 2022 года прадугледжвае, што да 2020 года доля медыцынскай дакументацыі, прадстаўленай у электронным выглядзе, павінна дасягнуць 100 працэнтаў, доля арганізацый аховы здароўя, падключаных да адзінай карпаратыўнай сеткі арганізацый аховы здароўя, - 100 працэнтаў. Для рэалізацыі гэтых задач зацверджана дзяржаўная праграма «Здароўе народа і дэмаграфічная бяспека Рэспублікі Беларусь» на 2016-2020 гады. Падпраграмай «Забеспячэнне функцыянавання сістэмы аховы здароўя Рэспублікі Беларусь» прадугледжана выкананне мерапрыемстваў па інфарматызацыі арганізацый аховы здароўя.
Цяпер чытаюць
«Шматпартыйнасць, плюралізм меркаванняў — гэта брахня, заходняя брахня». Лукашэнка разглядае канстытуцыйнае вяртанне да савецкай сістэмы79
Каментары