Лаўрэатамі Нацыянальнай прэміі беларускіх праваабаронцаў сталі Гуштын, Драздоўскі і Дрозд
У Мінску 9 снежня, напярэдадні Міжнароднага дня правоў чалавека, уручана штогадовая Нацыянальная прэмія беларускіх праваабаронцаў за дасягненні ў сферы правоў чалавека.
Лаўрэатаў вызначалі ў трох намінацыях — «Журналіст года», «Праваабаронца года» і «Кампанія/ініцыятыва года», узнагарода ў якой уручалася ўпершыню. У адрозненне ад прэмій мінулых гадоў адсутнічала намінацыя «Адвакат года». Паводле слоў кіраўніка Беларускага дома правоў чалавека Таццяны Равякі, гэта звязана з тым, што дзейнасць многіх адвакатаў, якія супрацоўнічаюць з праваабаронцамі, зараз знаходзіцца пад пільнай увагай уладаў, і адвакаты не хочуць яе афішаваць.
У намінацыі «Журналіст года» лаўрэатаў аказалася двое. Сярод іх — карэспандэнт інфармацыйнай кампаніі БелаПАН Адар'я Гуштын, якая спецыялізуецца на судовых рэпартажах і праваабарончай тэматыцы. Лаўрэатам таксама стаў рэдактар сайта Беларускага дакументацыйнага цэнтра, гісторык, экс-палітвязень Дзмітрый Дрозд.
У намінацыі «Праваабаронца года» прэмія ўручаная кіраўніку Офіса па правах людзей з інваліднасцю Сяргею Драздоўскаму — за адвакатаванне далучэння Беларусі да канвенцыі аб правах інвалідаў.
У намінацыі «Кампанія/ініцыятыва года» лаўрэатам стала рэдакцыя сацыяльнага інтэрнэт-часопіса «Имена», які з'явіўся сёлета.
Міжнародны дзень правоў чалавека адзначаецца 10 снежня.
Цяпер чытаюць
Кадэбэшнікі тэлефануюць беларусам у эміграцыі праз іх сяброў — чаго хочуць?10
Каментары