Даўно хацеў там пабываць, сёння нарэшце даехаў, дзякуючы «Куфэрку Падарожжаў». Былі коратка, самі аб'екты моцна спадабаліся: і касцёл, і млын, перароблены ў кавярню, і рэчка Лоша, якая нечакана ўразіла магутнасцю.
Але адгадайце, на якой мове вялі дзіцячую катэхезу ў фармальна літоўскамоўным касцёле? Па-беларуску? Па-польску? Не, на чыстай рускай мове.
Тое самае кавярня: надпісы не проста па-руску, але з тэндэнцыяй да славянскай вязі.
Ну і вось што там такое трындзелі арыштаваныя рэгнумаўцы? РБ на самай справе такі праект, які на даручанай яму тэрыторыі вельмі паспяхова русіфікуе ўсіх — не толькі беларусаў, але і палякаў з літоўцамі. Вышыванкай прыкрываецца, каб нейкіх ну зусім ужо наіўных увесці ў зман.
Я таксама дашчэнту наіўны кніжнік і фарысей. Мне то здавалася, што ў самай вялікай у РБ літоўскамоўнай вёсцы так файна было б убачыць рэкламу па-літоўску і пачуць у кавярні і ў касцёле літоўскую мову. Хай бы хаця б прывіталіся «Лаба дзена»! — дзе там.
Год таму быў у Індуры, таксама — нідзе ані слова па-беларуску або па-польску: выключна руская мова ў камунікацыі. А вы зірніце, дзе тая Індура. Неяк выразна свядомасць паспалітага чалавека падзяляе тыя нешматлікія ўрачыстыя нагоды, дзе можна не па-руску, а ўва ўсіх іншых — вялікі і магутны.
Каментары