Фігурант «справы педафілаў» Давыдовіч асуджаны за сувязь з падлеткамі на 5 гадоў, але адсядзіць менш за 2 гады
Вячаслаў Давыдовіч ужо быў асуджаны на 4 гады за эканамічныя злачынствы — ён адбывае свой тэрмін у калоніі. Але сёлета ў дачыненні да яго распачалі яшчэ і справу аб разбэшчванні і гвалтаванні непаўнагадовых (агулам — 5 крымінальных спраў). Суд праходзіў у закрытым рэжыме.
Перад агучваннем прысуду 28 снежня 50-гадовы Давыдовіч трымаўся бадзёра, нават пасміхаўся. Суддзя Вікторыя Зайцава вырашыла, што Вячаслаў Давыдовіч вінаваты ў дзеяннях сэксуальнага характару з асобамі, якія не дасягнулі 16 гадоў. Пакінулі і рашэнне аб тым, што Давыдовіч вінаваты ў незаконнай прадпрымальніцкай дзейнасці.
У выніку Давыдовіч асуджаны на 5 гадоў калоніі агульнага рэжыму. З улікам раней адбытага пакарання яму застаецца знаходзіцца пад вартай 1 год 8 месяцаў.
Сваю віну ён не прызнаў.
Акрамя таго, спачатку было распачата 5 крымінальных спраў, пасля шэраг абвінавачванняў быў зняты. Давыдовіча асудзілі толькі па адным «новым» артыкуле — за сувязь з непаўнагадовымі.
«У прынцыпе, сваёй мэты мы дасягнулі, знялі некалькі артыкулаў. Цяпер вырашаем, ці будзем абскарджваць прысуд», — сказала адвакатка Давыдовіча Кацярына Шакун.
У 2013 годзе Давыдовіч быў затрыманы. У 2014 — асуджаны на 4 гады за прадпрымальніцкую дзейнасць без рэгістрацыі.
Аднак ужо падчас яго затрымання было вядома, што Вячаслаў Давыдовіч звязаны з двума фігурантамі гучнай «справы педафілаў»: мужчыны абвінавачваліся ў разбэшчванні і гвалтаванні падлеткаў. Гаворка ішла пра некалькі тысяч дзяцей. Адзін з іх пасля атрымаў 17-гадовы тэрмін, другі пазней быў прызнаны неадэкватным і накіраваны на прымусовае лячэнне.
Абодва яны — выхадцы з дзіцячага дому, як і Давыдовіч. Мужчыны прадстаўляліся трэнерамі па веласпорце і футболе. Прывозілі дзяцей у катэдж да Давыдовіча — вялікі дом плошчай амаль 2 тысячы квадратных метраў у Зацані. Там падлеткі маглі «падпрацаваць на будоўлі». Ну і не толькі…
Таксама імя Вячаслава Давыдовіча фігуравала яшчэ ў адной гісторыі.
У 2009 годзе жанчына выкінула з акна двух малых дзяцей-блізнятак. Яна казала, што «памуцілася розумам» на той момант. Давыдовіча яе сваякі называлі «духоўным экстрасэнсам» мужа жанчыны, ускосна абвінавачвалі ў здарэнні.
Сам Давыдовіч вучыўся ў Акадэміі МУС, працаваў міліцыянтам, кадравым супрацоўнікам у Адміністрацыі прэзідэнта.
Цяпер чытаюць
У перамовах з Коўлам гэтым разам бярэ ўдзел і Турчын. З амерыканскага боку Сміт змяніўся на Паніка2
У перамовах з Коўлам гэтым разам бярэ ўдзел і Турчын. З амерыканскага боку Сміт змяніўся на Паніка
Электронную «Беларускую энцыклапедыю», створаную як прастору «верагодных ведаў пра Беларусь», ціха ліквідавалі разам з рэдакцыяй. Купу артыкулаў перадалі Гігіну44
Каментары