У беларусаў, якія прыбываюць у расійскія аэрапорты, пачалі правяраць пашпарты
У грамадзян Беларусі, якія прыбываюць у расійскія аэрапорты, пачалі правяраць пашпарты. Ці стане пашпартны кантроль пастаянным, залежыць ад дамоўленасцяў паміж МЗС Расіі і Беларусі, заявілі ў расійскай пагранслужбе.
Беларусы, якія прыбываюць на самалёце з Мінска ў Маскву, паведамляюць у сацсетках, што расійскія памежнікі сталі правяраць у іх пашпарты, хоць рэйс лічыцца ўнутраным і раней такіх праверак не было. У выніку пасажыры вымушаныя больш часу праводзіць у аэрапорце.
Як патлумачылі БелаПАН у пагранічнай службе ФСБ Расіі, гэта часовая мера, звязаная з тым, што зафіксавана шмат парушэнняў пры перасячэнні мяжы з Беларусі. Грамадзяне трэціх краін заўсёды павінны былі праходзіць пашпартны кантроль, растлумачылі ў пагранслужбе. Паколькі ў натоўпе пасажыраў складана выявіць, у каго беларускі пашпарт, а ў каго — замежны, правяраюцца ўсе, хто прыбывае з Беларусі ў Расію.
Ці стане пашпартны кантроль у расійскіх аэрапортах пастаянным, залежыць ад дамоўленасцяў паміж міністэрствамі замежных спраў Расіі і Беларусі. Цяпер гэта пытанне разглядаецца на ўзроўні знешнепалітычных ведамстваў, паведамілі ў расійскай пагранслужбе.
Там таксама запэўнілі, што гэта мера не звязаная з увядзеннем Беларуссю пяцідзённага бязвізавага рэжыму для замежнікаў (згодна з указам прэзідэнта Беларусі ад 9 студзеня для грамадзян 80 краін, якія прыбываюць праз Нацыянальны аэрапорт Мінск, з 12 лютага будзе дзейнічаць пяцідзённы бязвізавы рэжым).
Афіцыйны прадстаўнік Дзяржаўнага пагранічнага камітэта Беларусі Антон Бычкоўскі паведаміў, што з беларускага боку такіх новаўвядзенняў няма. «У Нацыянальным аэрапорце Мінск пашпартны кантроль грамадзян Беларусі і Расіі на ўнутраных рэйсах па-ранейшаму не ажыццяўляецца, памежнікі працуюць у штатным рэжыме», — сказаў ён.
У МЗС Беларусі сітуацыю не каментуюць.
Наземны кантроль на беларуска-расійскай мяжы стаў больш жорсткім з лістапада 2016 года. Замежнікам па сутнасці забаранілі транзітам ехаць з Беларусі ў Расію — яны могуць патрапіць туды толькі праз міжнародныя пункты пропуску. На мяжы паміж Беларуссю і Расіяй такіх няма, таму замежным турыстам застаецца ехаць у аб'езд праз Латвію або праз пункт пропуску «Новыя Юркавічы» ў Бранскай вобласці, які мае статус міжнароднага, бо знаходзіцца на стыку межаў Беларусі, Украіны і Расіі.
Цяпер чытаюць
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа21
Каментары