На сайце Камуністычнай партыі Беларусі зьмешчаны артыкул з крытыкай уладаў за перамовы з грамадзкасьцю ў справе мэмарыялізацыі Курапатаў.
«Магчыма, што такім чынам улада спрабуе часткова зьнізіць сацыяльную напругу, адцягнуць увагу грамадзтва ад сырога дэкрэту № 3 і прапанаваць тэму для дыскусій».
«Нас таксама насьцярожвае і магчымы зьнешнепалітычны ўплыў. За апошнія паўтара года «пацяпленьня» стасункаў з Эўразьвязам у Курапаты зачасьцілі афіцыйныя польскія дэлегацыі. Што яны маглі там забыцца? Падтэкст, відаць, такі, што ў Курапатах пахаваныя польскія грамадзяне», — піша аўтар артыкула.
Аўтар публікацыі настойвае на тым, што дагэтуль дакладна невядома, хто пахаваны ў Курапатах.
Аўтар таксама выстаўляе прэтэнзію ўладам за перамовы з «радыкаламі» ў справе Курапатаў. Маюцца на ўвазе і круглы стол у «Советской Белоруссии», і адмысловае ток-шоў на дзяржаўным ТБ, і сам факт спыненьня будаўніцтва. Аб прадстаўніках улады, якія ідуць на кантакт з грамадзкасьцю, сайт Кампартыі піша:
«Падобныя «галубы-міратворцы» ў шэрагах улады мусяць разумець, што ўсе перамовы з радыкаламі і саступкі канчаюцца аднолькава: дай палец, адкусяць і руку».
