Памёр былы дыктатар Панамы Мануэль Нар'ега. Адхілены ад улады падчас амерыканскага ўварвання генерал амаль 20 гадоў правёў у турме.
Пра смерць Нар'егі ў сваім Twitter паведаміў цяперашні прэзідэнт Панамы Хуан Карлас Варэла. «Смерць Мануэля Нар'егі закрывае цэлы раздзел у гісторыі нашай краіны. Яго дочкі заслугоўваюць таго, каб пахаванне прайшло мірна», — напісаў ён.
Як паведамляе агенцтва Reuters, у сакавіку гэтага года Нар'егу была зробленая аперацыя з-за пухліны ў мозгу. Пасля яе ўзніклі ўскладненні, якія прывялі да таго, што былы дыктатар трапіў у кому.
Нар'ега (1934 года нараджэння) быў фактычным кіраўніком Панамы ў 1983—1989 гадах. Карыстаючыся падтрымкай ЦРУ, ён кантраляваў урад краіны і арганізоўваў фальсіфікацыю выбараў.
У 1989 годзе Нар'ега быў абвінавачаны амерыканскімі ўладамі ў арганізацыі гандлю наркотыкамі. У выніку ўварвання арміі ЗША ён быў арыштаваны і прысуджаны да 40 гадоў пазбаўлення волі. У 2010 годзе Нар'ега быў экстрадаваны ў Францыю, дзе ён правёў яшчэ год у турме па абвінавачванні ў адмыванні грошай.
У 2011 годзе Нар'егу выдалі Панаме, якая абвінавачвала былога дыктатара ў арганізацыі забойства. У турме сталіцы краіны ён правёў апошнія гады свайго жыцця
Цяпер чытаюць
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль7
Каментары